„ქართული გაზეთის“ რედაქტორი გუგა სულხანიშვილი უმრავლესობის ლიდერს ზვიად კვაჭანტირაძეს სთხოვს, პასუხი გასცეს საზოგადოებას, გადაიხადა თუ არა ჯარიმა სტამბოლში მომხდარი ინციდენტის გამო.

როგორც სულხანიშვილი ამბობს, პასუხის მისაღებად მან საგარეო უწყებას და სახელმწიფო სახაზინო სამსახურსაც მიმართა, თუმცა უშედეგოდ.

"უბრალოდ უნდა გამოვიდეს და თქვას გადაიხადა თუ არა მასზე დაკისრებული ჯარიმა. ჩვენ წერილობით მივმართეთ სახელმწიფო სახაზინო სამსახურს და საგარეო საქმეთა სამინისტროს, თუმცა პასუხი არ მიგვიღია. ნაცვლად იმისა, რომ სახელმწიფო დაწესებულებები ცდილობდნენ ჭეშმარიტების დადგენას, რჩება განცდა, რომ ეს დაწესებულებები ხელს აფარებენ და თანამზრახველები არიან ზვიად კვაჭანტირაძის უმსგავსო ქმედების. ასეთი ადამიანი არ შეეფერება საჯარო მოხელის თანამდებობას," - აცხადებს ქართული გაზეთის მთავარი რედაქტორი გუგა სულხანიშვილი.

როგორც ცნობილია, ზვიად კვაჭანტირაძემ გენკონსულობის ბოლო წელს, გენერალური საკონსულოსთვის, სახელმწიფოს ხარჯზე, გამოიყვანა სრულიად ახალი „მინივენი“. ნასვამი მიუჯდა დაუზღვეველი ავტომობილის საჭეს და შეეჯახა ბოძს. ავტომობილი ისე დაიმტვრა, მისი აღდგენა შეუძლებელი გახდა. სასამართლომ კვაჭანტირაძეს 80 ათასი ლარის ანაზღაურება დააკისრა საგარეო საქმეთა სამინისტროს სასარგებლოდ, მაგრამ მან არც ამჯერად აანაზღაურა მიყენებული ზიანი.