სოკარი ფეხბურთის ფედერაციას აღარ დააფინანსებს?- გაგრძელდება თუ არა კონტრაქტი, ამ ეტაპზე უცნობია

პოლიტიკა - 18:09, 15 Jan, 2016

1619

აზერბაიჯანული კომპანია "სოკარის" მიერ საქართველოს ფეხბურთის ფედერაციის დაფინანსების საკითხი კითხვის ნიშნის ქვეშ დგება.

როგორც ირკვევა, ფედერაციასა და „სოკარს“ შორის დადებულ ხელშეკრულებას ვადა ამოეწურა. აზერბაიჯანული კომპანია 2012 წლიდან ქართული ფეხბურთის მმართველი ორგანოს გენერალური სპონსორი იყო, თუმცა გაგრძელდება თუ არა ხელშეკრულება ამის თქმა ორივე მხარეს უჭირს.

როგორც ფეხბურთის ფედერაციაში „ნიუპოსტს“ განუცხადეს, სოკარის მიერ დაფინანსებაზე უარის თქმას არ ადასტურებენ.

„ამ ეტაპზე ჯერჯერობით გარკვეული არაფერია და ფედერაცია ამ დრომდე აწარმოებს მოლაპარაკებებს როგორც სოკართან, ასევე სხვა კომპანიებთან“ - აცხადებენ პრესსამსახურში.

„ნიუპოსტი“ აღნიშნულ თემაზე „სოკარ ჯორჯიას“ წარმომადგენელსაც ესაუბრა.

ირაკლი ზუბიტაშვილი აცხადებს, რომ ფეხბურთის ფედერაციასა და კომპანია „სოკარს“ შორის მოლაპარაკებები აქტიურად მიმდინარეობს.

„უკანასკნელი წლების განმავლობაში „სოკარი“ ძალიან ნაყოფიერად თანამშრომლობდა ფეხბურთის ფედერაციასთან. ჩვენი მხრიდან, ძალიან ბევრი პროექტი განხორციელდა ქართული ფეხბურთისთვის. ინფრასტრუქტურის განვითარება, სათამაშო მოედნებზე ევროპის დონის საფარების დაგება, ეროვნული ნაკრების მხარდაჭერა და სხვა უამრავი. მოგეხსენებათ, რომ 2015 წელს ეს კონტრაქტი ამოიწურა, არ გაუქმებულა, უბრალოდ ვადა ამოეწურა. ამის პარალელურად შეიცვალა ფედერაციის მმართველობა, ამ ეტაპისთვის მიმდინარეობს მათთან მოლაპარაკება კონტრაქტის გაგრძელების ფორმატზე, ვმსჯელობთ იმაზე, როგორ შეიძლება ურთიერთობის გაგრძელება“- აღნიშნა „ნიუპოსტთან“ საუბრისას ზუბიტაშვილმა.

კითხვაზე, შეიძლება თუ არა დაზუსტებით ითქვას, რომ სოკარი ფეხბურთის ფედერაციას კვლავ დააფინანსებს კომპანია“ სოკარის“ წარმომადგენელმა აღნიშნა, რომ ეს მოლაპარაკების დასრულების შემდეგ გაირკვევა.

„საქართველოს ფეხბურთის ფედერაციასთან გვაქვს მოლაპარაკება. ამ ეტაპზე თავს შევიკავებ კონკრეტული პასუხისგან. დააფინანსებს თუ არა კომპანია მომავალში ფედერაციას, ეს დამოკიდებულია მოლაპარაკების შედეგებზე“- განმარტა ირაკლი ზუბიტაშვილმა.

ჩვენ ასევე დავინტერესდით, დაფინანსებასთან დაკავშირებით კითხვის ნიშნების არსებობა საქართველოს ხელისუფლების „გაზპრომთან“ მოლაპარაკებით ხომ არ არის გამოწვეული, რაც ირაკლი ზუბიტაშვილმა „ნიუპოსტთან“ საუბრისას გამორიცხა.

დავით ჯაბაშვილი