"შს მინისტრისგან სირცხვილია ასეთი განცხადება!"- ზაზა ჭაია მღებრიშვილს აკრიტიკებს

სოც.მედია - 15:20, 15 Jan, 2016

5579

"სამართალდამცველთა დაცვის ლიგის" წევრი, ზაზა ჭაია შინაგან საქმეთა მინისტრს მის მიერ გაკეთებული განცხადების გამო აკრიტიკებს. ჭაიას თქმით გიორგი მღებრიშვილის მიერ თელაველი პოლიციელების მკვლელობაში ეჭვმიტანილის „ფსიქიურად აშლილად“ გამოცხადება უადგილო თავის მართლებაა:

„ბოროტმოქმედის მიერ, კახეთში, თავხედურად დახოცილ პოლიციელთა დაკრძალვამდე, თავს ვიკავებდი შს მინისტრის კრიტიკამდე, თუმცა საქართველოში პოლიციელებზე მოურიდებლად ვიტყვი ნადირობას, შს მინისტრის მხრიდან გამაოგნებელი კომენტარი მოჰყვა, რამაც საზოგადოების მწვავე რეაქცია გამოიწვია. ბათუმში 21 წლის პოლიციელის

მკვლელობაზე, შსს-მ სამარცხვინოდ განაცხადა, სამსახურეობრივ მოვალეობას არ ასრულბდაო და მხედრული პატივიც კი არ მიაგო მას. თუმცა საზოგადოების მხრიდან მკაცრი გაკიცხვის შემდეგ უკვე იკადრეს, ბორჯომში და თბილისში დახოცილ პოლიციელთა მხედრული პატივით დაკრძალვა. თელავის საპატრულო პოლიციის ეზოში ჯერ პოლიციელთა სისხლი გამშრალი არც იყო, როცა შს მინისტრმა განაცხადა, მკვლელს „წინასწარი მონაცემებით, ფსიქიკური პრობლემები აქვს და ფსიქიკური აშლილობა აქვს“-ო. ბ-ნ მინისტრო! როცა არც ექსპერტიზებია და არც გამოძიებას დაუდგენია, თქვენ მიერ მკვლელის „ფსიქიკურად აშლილად“ გამოცხადება, საზოგადოებამ უადგილო თავის მართლებად და პოლიციელთა გაუგონარი და თავხედური მკვლელობის თქვენდაუნებურ ახსნად აღიქვა. რომ არ აღმოჩნდეს „ფსიქიკურად აშლილი“ ბოროტმოქმედი მერე რა პასუხს აძლევთ ან საზოგადოებას და ან საკუთარ ოფიცრებს? როგორ ფიქრობთ, „ფსიქიკურად აშლილმა“ პირმა, ჯერ მაინცდამაინც პოლიციელებს გაუხსნა ცეცხლი, შემდეგ იარაღი გადამალა, თავი მოიმძინარა და გაქცევა სცადა? ეს „ფსიქიკურად აშლილის“ ქცევას გავს? რომ არ აღმოჩნდეს მკვლელი „ფსიქიკურად აშლილი“, ხელში ხომ თქვენი და თქვენი გუნდის არაპროფესიონალზმი შეგვრჩება და ამის გამართლებას ცდილობთ? ან ვის აინტერესებს თქვენი „წინასწარი მონაცემები“, რომელიც ერთი-ერთში ჯდება პოლიციელთა მკვლელის დაცვის მხარის პოზიციასთან, რომელსაც რასაკვრიველია თავადაც სურს მკვლელი, „ფსიქიურად აშლილად“ შერაცხოს. პოლიციელთა მკვლელობა, გარდა სახელმწიფო ინტერესების შელახვისა, ტრაგედიაც არის და შს მინისტრისგან სირცხვილია ასეთი განცხადება!“- წერს ზაზა ჭაია ფეისბუკზე.

ჭაია ფოთის პროკურორის მანქანის დაცხრილვასაც გამოეხმაურა:

„ყველაფერს წარმოვიდგენდი, მაგრამ შს მინისტრის მიერ, ბოროტმოქმედთა წინააღმდეგ „შეუწყნარებელი პოლიტიკის“ გამოცხადების შემდეგ, პროკურორებს, ავტომატებით ქუჩაში სროლას და დევნას თუ დაუწყებდნენ, მართლა ვერ წარმოვიდგენდი!“