გაზეთ „ქრონიკა+“-ის მთავარი რედაქტორის ელისო კილაძის განცხადებით აღმასრულებელ ხელისუფლებაში სპეციალური ჯგუფია შექმნილი, რომელიც პირადი ცხოვრების ამსახველი კადრებით ადამიანების დაშანტაჟებაზე მუშაობს და ამ პროცესებში აქტიურად ჩართულნი არიან დიასპორის მინისტრისა და სუსის უფროსის მოადგილეები. აღნიშნული განცხადება კილაძემ დღეს გამართულ პრესკონფერენციაზე გააკეთა. კილაძის თქმით იგეგმება შეწყალების კომისიის ყოფილი და მოქმედი თავმჯდომარეების დაშანტაჟება.

„ძალიან მძიმე პროვოკაცია იგეგმება, გადაწყდა, რომ შეწყალების კომისიის ყოფილი და მოქმედი თავმჯდომარეები ალეკო ელისაშვილი და ზვიად ქორიძე დააშანტაჟონ. სანდრო ბრეგაძეს სპეცსახსრებიდან 30 ათასი დოლარი აქვს მოთხოვნილი, რომელიც მას ამ გეგმის განსახორციელებლად სჭირდება.“- განაცხადა ელისო კილაძემ.

ჟურნალისტის თქმით ამ ჯგუფის შემადგენლობაში შედიან უსაფრთხოების სააგენტოს დირექტორის მოადგილე იოსებ გოგაშვილი, დიასპორის მინისტრის მოადგილე სანდრო ბრეგაძე, საინფორმაციო სააგენტო „მარშალპრესი“, ლადო სადღობელაშვილი, „ასავალ-დასავალის“ ჟურნალისტი ზაზა დავითაია ჯგუფი საიდუმლო შეხვედრებს ვაშლიჯვრის რესტორანში მართავს.

ელისო კილაძე საქართველოს პრემიერ-მინისტრს აღნიშნულ საკითხზე რეაგირებას სთხოვს და მოუწოდებს, რომ ამ ჯგუფს გაემიჯნოს.