გთავაზობთ "რეფორმატორთა კლუბის" ექსპერტის ირაკლი კობიძის წერილს, რომელიც ადგილობრივი თვითმმართველობის არჩევნებში სამხედრო მოსამსახურეების მონაწილეობას ეხება:

"ადგილობრივი თვითმმართველობა წარმოადგენს შესაბამის დასახლებაში მცხოვრები ხალხის უფლებას გადაწყვიტონ ადგილობრივი მნიშვნელობის საკითხები მათ მიერ პირდაპირი წესით არჩეული საკრებულოსა და გამგებლის მეშვეობით.

ანუ, უმთავრესად საკრებულოსა და გამგებლის ამომრჩეველი უნდა იყოს ადგილობრივი მაცხოვრებელი, მუნიციპალიტეტის საქმიანობის ეფექტურობის უზრუნველყოფის მიზნით.

ეკონომიკური განვითარების ინტერესებიდან გამომდინარე, კანონმდებლობა იცნობს საარჩევნო უფლების გარდა, ადგილობრივ თვითმმართველობაში საზოგადოების ისეთი მონაწილეობის ფორმასაც, როგორიცაა დასახლების საერთო კრება, რომლის წევრობის უფლებაც დასახლების მაცხოვრებლის გარდა აქვთ იმ პირებსაც, რომლებიც შესაბამის ტერიტორიაზე ფლობენ უძრავ ქონებას.

საერთაშორისო გამოცდილება ხალხის ინტერესებიდან გამომდინარე იცნობს უცხოელების მონაწილეობასაც მუნიციპალურ არჩევნებში - კალიფორნიის შტატის ზოგიერთ მუნიციპალიტეტში უზრუნველყოფილია აშშ-ს მოქლაქეობის არმქონე პირთა საარჩევნო უფლება იმ მიზეზით, რომ ისინი არიან მუნიციპალური სერვისების მომხმარებლები, როგორც დასახლების მაცხოვრებლები.

მაგრამ, სრულიად გაუგებარია ქართული კანონმდებლობის რეგულაციები, რომელიც დასაშვებად მიიჩნევს სამხედრო მოსამსახურეთა ადგილობრივი თვითმმართველობის არჩევნებში მონაწილეობის შესაძლებლობას მხოლოდ იმიტომ, რომ მათი დისლოკაციის ადგილი განთავსებულია შესაბამისი მუნიციპალიტეტის ტერიტორიაზე.

მიგვაჩნია, რომ აღნიშნული მექანიზმი არ შეესაბამება ადგილობრივი თვითმმართველობის არსს და ხელს უწყობს მთავრობას მანკიერი მეთოდებით განახორციელოს საარჩევნო პროცესზე ზემოქმედება," - წერს ,,რეფორმატორთა კლუბის” ექსპერტი ირაკლი კობიძე.