მინისტრები ერაყელი სტუდენტების პროტესტს გამოეხმაურნენ

პოლიტიკა - 13:59, 15 Jan, 2016

2049

ერაყელი სტუდენტებისთვის ბინადრობის უფლების შეჩერების საკითხს საქართველოს მტავრობის წევრები გამოეხმაურნენ. იუსტიციის მინისტრის თქმით ბინადრობაზე უარი დაკავშირებული იყო სხვადასხვა შეფასებით მოსაზრებასთან, რომელიც ქვეყნის უსაფრთხოებასთან არის დაკავშირებული. აღნიშნული განცხადება იუსტიციის უწყების ხელმძღვანელმა მთავრობის ადმინისტრაციაში გამართულ პრესკონფერენციაზე გააკეთა. როგორც წულუკიანმა განაცხადა აღნიშნულ პირებს შეუძლიათ გადაწყვეტილება სასამართლოში გაასაჩივრონ:

"მოცემულ პირებს შეუძლიათ ეს გადაწყვეტილება სასამართლოში გაასაჩივრონ. როგორც გადაწყვეტილებაშია ასახული უარი დაკავშირებული იყო, სხვადასხვა შეფასებით მოსაზრებასთან, რომელიც ჩვენი ქვეყნის უსაფრთხოებასთანაა კავშირში" განაცხადა წულუკიანმა.

აღნიშნულ საკითხს გამოეხმაურა განათლებისა და მეცნიერების მინისტრიც. როგორც თამარ სანიკიძემ მთავრობის სხდომის დასრულების შემდეგ განაცხადა ერაყელ სტუდენტებს ბინადრობის მოწმობის აღების დროს გარკვეული ხარვეზები დაუფიქსირდათ, რომლებიც საკანონმდებლო ჩარჩოდან გამომდინარეობდა. ამასთანავე მათ გასავლელი ჰქონდათ კანონით დადგენილი უსაფრთხოების ნორმებიც:

„ერაყელი სტუდენტები უკვე სამი წელია საქართველოში ცხოვრობენ , მაგრამ ბინადრობის მოწმობის აღების დროს გარკვეული ხარვეზები დაუფიქსირდათ, რომლებიც საკანონმდებლო ჩარჩოდან გამომდინარეობს, ასევე, მათ პროცედურებით დადგენილი უსაფრთხოების ნორმებიც გასავლელი ქონდათ . შესაბამისად, მათ ამ ეტაპზე ვერ მიიღეს ბინადრობის მოწმობა.“- აღნიშნა სანიკიძემ და იუსტიციის მინისტრის მსგავსად მანაც ხაზი გაუსვა იმ ფაქტს რომ ერაყელ სტუდენტებს შეუძლიათ სასამართლოს მიმართონ.

საპროტესტო აქცია ერაყელმა სტუდენტებმა 12 იანვარს გამართეს. აკაკი წერეთლის სახელობის სახელმწიფო უნივერსიტეტის სტუდენტები ბინადრობის უფლების ჩამორთმევა გააპროტესტეს. 10 სტუდენტს ბინადრობის უფლება იუსტიციის სამინისტრომ შეუჩერა, რის გამოც მათ ქვეყანა 30 დღეში უნდა დატოვონ. ერაყელ სტუდენტებს სწავლის დამადასტურებელი დოკუმენტი უნივერსიტეტმაც მისცა.

სტუდენტების თქმით, ბინადრობის უფლების შეჩერების მიზეზი არ უთქვამთ, მხოლოს ის უთხრეს, რომ მათი საქართველოში ყოფნა საშიშია.