გუგული მაღრაძე ჟურნალისტს: შუბა არ უნდა მეცვას? თქვენ რა ცხოველთა დაცვის საზოგადოებიდან ხართ?

პოლიტიკა - 15:09, 15 Jan, 2016

22881

საზოგადოების რისხვა საკუთარი გამონათქვამების გამო, გუგული მაღრაძეს უკვე მესამედ დაატყდა.

ჯერ იყო პირდაპირ ეთერში გარემოვაჭრეებთან კონფლიქტი. როცა ამ უკანასკნელმა საკუთარი დაღლილობა პარლამენტში, გარემოვაჭრეების დაღლას გაუთანაბრა.

მაშინ ერთ-ერთმა გარემოვაჭრემ გუგული მაღრაძეს ასე მიმართა:

„ერთი დღე გაატარონ თვითონ გარეთ, ქუჩაში, წვიმაში, თოვაში. ერთი დღე გაატარეთ ჩვენ გვერდით. თქვენნაირი ქალები ვართ, შვილების დედები ვართ და გავზარდეთ საუკეთესო შვილები, მომავალი თაობა. ერთი დღე გაატარეთ ჩემთან ერთად თქვენ და თქვენმა კოლეგებმა. საღამოს რომ მოხვალთ ფეხებსველი, გაყინული, გაციებული, ახლა საჭმელი უნდა გააკეთო და ღამეც ვერ დაიძინო. რომ დაწვები მერე, მაშინ გადახარშე, თურმე რას ვუძლებ მე პირადად 15 წელია“.

არანაკლებ სკანდალური იყო „ქართული ოცნების“ დეპუტატის განცხადება იმასთან დაკავშირებით, რომ თურმე “სერიოზული მცოდნე ადამიანი საჯარო სამსახურში 2 000 ლარად არ გაგიჩერდება“.

გუშინ კი, ოლიგარქის მიერ ძველით ახალი წლის აღსანიშნავად მიწვეული გუგული მაღრაძის ჩაცმულობამ, კონკრეტულად ძვირადღირებული ბეწვის ქურქმა, ხელმომჭირნე დიასახლისების და არა მარტო მათი გულისწყრომა გამოიწვია.

„ფოტო ხომ გენიალურია და ფოტოს მიღმა რამდენი საინტერესო ამბავია. მოტეხილი ქოცები, "შუბები", სუფრა, საიდუმლო სერობის დეტალები, ყელში გაჩხერილი ლუკმები, ბესელკას კისკისი, თამადას დილემა (ჯერ პატრიარქი დალიოს, თუ ჯერ ბიძინა) p.s. ცუდი ამ ყველაფერში ის არის, რომ აი ეს შაპიტო განსაზღვრავს, როგორ ქვეყანაში ვიცხოვრებთ“- წერს სოციალურ ქსელში სცენარისტი ქეთი დევდარიანი.

სოციალური ქსელის მომხმარებელი ლევან კირვალიძე იმ პირთა შორისაა, ვინც გუგული მაღრაძის ჟესტს აკრიტიკებს.

„ეს ის ქალია, ეკონომიურ ცხოვრებს რომ გვასწავლიდა და თავის დროზე ,,იმედის კვირის" ეთერიდან გარემოვაჭრეებს პასუხობდა, გარეთ რო დგახართ საგრანტო პროექტები წერეთო და მიიღებთ დაფინანსებასო. ისე თვითონაც კი არ უხდება ეს შუბა, მანქანა, მძღოლი და ყელსაბამიც. ახალ წელს გილოცავთ, ქალბატონო გუგული. ჩვენს ბუდეებს ასე ადვილად ნუ გადაუფრენთ მაინც“- წერს კირვალიძე.

„ნიუპოსტი“ თავად დეპუტატსაც დაუკავშირდა, რომელიც თვლის, რომ „შუბას“ იმსახურებს.

„შუბა არ უნდა მეცვას? არ შეიძლება შუბა ჩავიცვა? - თქვენ რა ცხოველთა დაცვის საზოგადოებიდან ხართ?“ - გვითხრა დეპუტატმა.

გუგული მარღაძეს ეკონომიურ ცხოვრებაზე მის მიერ გაკეთებული განცხადება შევახსენეთ.

„მე როცა პოლიტიკაში ვარ, ძალიან გთხოვთ მკითხეთ პოლიტიკური საკითხები. დამირეკეთ პოლიტიკურ განცხადებებზე, როდის რას ჩავიცვამ ეს ჩემი საქმეა“- აღნიშნა მან.