საფრანგეთი საქართველოს მოქალაქეებისთვის ვიზის გაცემის ვადას ამცირებს

პოლიტიკა - 12:43, 14 Jan, 2016

6181

საფრანგეთის ვიზების გაცემის ვადების შემცირებასთან დაკავშირებით ქვეყნის საგარეო საქმეთა მინისტრმა ლორან ფაბიუსმა განცხადება ორშაბათს გააკეთა. როგორც ფრანგული მედია იტყობინება ვიზების მიღების ვადა ჩინეთის მოქალაქეების ტურისტული ჯგუფებისთვის 48 საათიდან 24 საათამდე,ხოლო საქართველოს, ინდონეზიის, სომხეთის, თურქეთის და ვიეტნამის მოქალაქეებისთვის 48 საათამდე შემცირდა. ფაბიუსის განცხადებით აღნიშნული ცვლილება ძალაში მალე შევა თუმცა კონკრეტული თარიღი არ დაუსახელებია. საფრანგეთის საგარეო უწყების ხელმღვანელის თქმით აღნიშნული ცვლილება საფრანგეთის ტურისტული პოტენციალის სრულყოფილად გამოყენებისთვის ხორციელდება.

სისტემა „ვიზა-48 საათში“ უკვე მოქმედებს ინდოეთის, სამხრეთ აფრიკის და სპარსეთის ყურის ქვეყნებისთვის.

ამასთანავე, მინისტრის თქმით წინსვლა არის ციფრული საკონსულოების შემნის საქმეშიც. როგორც ფაბიუსმა განაცხადა, აღნიშნული ცვლილება კონსულებს საშუალებას მისცემს უფრო მეტად დაკავდნენ ჰუმანიტარული საკითხებით, ვიდრე ადმინისტრაციულით. ამ პროექტის დასრულებას მინისტრი 2020 წლისთვის ვარაუდობს, რის შემდეგაც, როგორც მინისტრი აცხადებს საზღვარგარეთ მყოფ საფრანგეთის მოქალაქეებს საშუალება ექნებათ საკონსულოების მომსახურებით 24 საათიან რეჟიმში ისარგებლონ.