ჩვენი ძირითადი მომწოდებელი და პარტნიორი იყო და რჩება აზერბაიჯანი

ჩვენი ძირითადი მომწოდებელი და პარტნიორი იყო და რჩება აზერბაიჯანი - დავით უსუფაშვილი

პოლიტიკა - 21:15, 13 Jan, 2016

1431

საქართველოს პარლამენტის თავმჯდომარის, დავით უსუფაშვილის განცხადებით, ბუნებრივი აირის ძირითადი მომწოდებელი და საქართველოს ძირითადი პარტნიორი ამ საკითხში იყო და რჩება აზერბაიჯანი.

დავით უსუფაშვილმა მედიასთან ამ საკითხზე დღეს, საქართველოს პარლამენტის ეროვნულ ბიბლიოთეკაში ისაუბრა, სადაც ლიტვის საელჩოს მიერ ორგანიზებულ დისკუსიაში მიიღო მონაწილეობა.

„დღეს, ძალიან ბევრი ისე ხატავს სიტუაციას, თითქოს ჩვენ გამოვძებნეთ „გაზპრომი“ და ახლა გავმართეთ მათთან მოლაპარაკებები. „გაზპრომთან“ საქართველო მუდმივად, ამ წლების განმავლობაში იყო ხელშეკრულებით ურთიერთობაში. ამ ხელშეკრულებებს აქვს პირობები და მას აქვს ვადები. „გაზპრომთან“ ხელშეკრულების გაგრძელება იმისთვის, რომ საქართველოს ტერიტორიაზე არსებული, საქართველოს საკუთრებაში არსებული მილსადენი, რომელიც მოხერხდა თავის დროზე და არ გაიყიდა, არ მიეყიდა რუსეთს და გახსოვთ რამდენიმე წლის წინ ამაზე საუბრობდნენ წინა ხელისუფლების წარმომადგენლები, იმ გაზსადენში გადის გაზი, რომელიც მიეწოდება სომხეთს. ამასობაში, ამ გაზსადენის ოპერირების პირობები, საქართველოს მიერ ტრანზიტის საფასურის ვადები, პირობები, სხვა საკითხები, რომელიც ამასთან დაკავშირებულია, არის აუცილებლად მოსალაპარაკებელი. ამიტომ, თავისათავად, მოლაპარაკების ფაქტში რა სიახლე და რა პრობლემაა, მე არ მესმის“,- აღნიშნა დავით უსუფაშვილმა. საქართველოს პარლამენტის თავმჯდომარე დარწმუნებულია, რომ საქართველოს ენერგეტიკის მინისტრი „გაზპრომთან“ გამართული მოლაპარაკებების შესახებ გაჩენილ დამატებითი კითხვებს უფრო დაწვრილებით გასცემს პასუხს.
„ჩვენი ძირითადი მომწოდებელი და ძირითადი პარტნიორი ამ საკითხში იყო და რჩება აზერბაიჯანი. რაც შეეხება დამატებით სარეზერვო საშუალებებს, იქნება ეს თურქეთიდან, ირანიდან, ხვალ სომხეთში თუ აღმოჩნდება გაზი და იქედან შეგვეძლება დამატებითი საჭიროებისთვის, თუ დაგვჭირდა იქიდან შემოვიტანოთ. ეს შესაძლებლობები, ეს ვარიანტები საქართველოს უნდა ჰქონდეს“,- განაცხადა ჟურნალისტებთან საუბრისას დავით უსუფაშვილმა.