კალაძის მიერ გუშინ გაჟღერებული ინფორმაცია არ შეესაბამება ჩვენთვის მოწოდებულ პასუხებს- თამარ კორძაია

პოლიტიკა - 15:10, 13 Jan, 2016

1038

ფრაქცია „რესპუბლიკელების“ წევრის თამარ კორძაიას განცხადებით, ენერგეტიკის მინისტრის მიერ Gazprom-თან მოლაპარაკებებთან დაკავშირებით გუშინ გაჟღერებული ინფორმაცია 30 ოქტომბერს სამინისტროდან ფრაქციაში მიღებულ პასუხებს არ შეესაბამება. აღნიშნული განცხადება დეპუტატმა დრეს გამართულ პრესკონფერენციაზე გააკეთა:

"ჩვენ გვაინტერესებდა, იზრდებოდა თუ არა საქართველოში რუსული გაზის მიწოდება და თუ იზრდება, რა სეგმენტზე. ეს არის სოციალური გაზი თუ კომერციული მოწოდება, ასევე გათვლილია თუ არა პოლიტიკური რისკები, რომელიც შეიძლება Gazprom-თან ურთიერთობას მოჰყვეს. გუშინ ენერგეტიკის მინისტრის მიერ გაჟღერებული ინფორმაცია არ შეესაბამება ჩვენთვის 30 ოქტომბერს მოწოდებულ პასუხებს. ამ პასუხებში მითითებულია, რომ "სოციალური სეგმენტის მოთხოვნის უზრუნველყოფის მიზნით სოკართან გაფორმებულია გრძელვადიანი ხელშეკრულება, 2009 წლიდან. სახელმწიფო Gazprom-იდან კომერციული სექტორისათვის ამ ეტაპზე არ გეგმავს ბუნებრივი აირის შესყიდვას, რადგან კომერციული სექტორი დერეგულირებულია და კომერციულ მომხმარებლებს აქვს შესაძლებობა, თავად აირჩიონ მომწოდებელი და გააფორმონ ხელშეკრულება". შესაბამისად, ამ პასუხში ჩანს, რომ რუსეთიდან გაზის ექსპორტის გაზრდა არც სოციალურ გაზზე და არც კომერციულ გაზზე არ იგეგმებოდა . გუშინ კი გაჟღერდა ინფორმაცია, რომ უნდა გაიზარდოს იმ დეფიციტის შესავსებად, რაც აქვს საქართველოს. მაშინ, გვჭირდება დასაბუთება, რომელ სეგმენტზე გაიზარდა მოთხოვნა და რა შეიცვალა ამ ორი თვის განმავლობაში ისე, რომ ეს პირობები შეიცვალა"- განაცხადა კორძაიამ, მისი თქმით რესპუბლიკური პარტიისთვის ასევე მნიშვნელოვანია, ისიც, რამდენად გათვლილი აქვს ხელისუფლებას გაზის მიწოდების გაზრდის მიზეზით რუსეთთან ურთიერთობის გაღრმავების პოლიტიკური ფასი.

"პასუხი იყო ასეთი- "იმის გათვალისწინებით, რომ არ იგეგმება ამ ეტაპზე სახელმწიფოს მიერ Gazprom-იდან კომერციული გაზის შესყიდვა, პოლიტიკური რისკების მონეტიზაციის საკითხი დღის წესრიგში არ დგას". შესაბამისად, ორი თვის წინ პოლიტიკური რისკების მონეტიზაცია არ ხდებოდა, ჩვენ გვაინტერესებს, რადგან ამ ორი თვის განმავლობაში ვითარება შეიცვალა, მოხდა თუ არა და დაიწყო თუ არა პოლიტიკური რისკების მონეტიზაცია. გვჭირდება, ვიცოდეთ, რა მოხდა ფაქტობრივად ისეთი, რომ ორი თვის განმავლობაში ამ წერილის შინაარსი შეიცვალა"- აღნიშნა კორძაიამ