საქართველომ სასამართლო სისტემის დამოუკიდებლობა უნდა უზრუნველყოს

საქართველომ სასამართლო სისტემის დამოუკიდებლობა უნდა უზრუნველყოს - ევროსაბჭო

პოლიტიკა - 10:00, 13 Jan, 2016

1978

საქართველომ უნდა განაგრძოს სასამართლო სისტემის დამოუკიდებლობისა და მიუკერძოებლობის გაძლიერება.

ამის შესახებ ევროსაბჭოს ადამიანის უფლებათა კომისარი ნილს მუჟნიეკსი საქართველოში ვიზიტის შემდეგ თავის ანგარიშში წერს, რომელიც ევროსაბჭოს ოფიციალურ გვერდზე გამოქვეყნდა.

„საქართველოში სასამართლო რეფორმებმა გარკვეული დადებითი შედეგები გამოიღო. კერძოდ, შემცირდა პროკურატურის ორგანოებზე გავლენა, გაიზარდა იუსტიციის უმაღლესი საბჭოს გამჭვირვალე მუშაობა და გაუმჯობესდა არასრულწლოვანთა მართლმსაჯულების სისტემა. თუმცა, სტრუქტურული პრობლემები კვლავ მოითხოვს სერიოზულ ყურადღებას, განსაკუთრებით სასამართლოს დამოუკიდებელი და ეფექტური ფუნქციონირების კუთხით“ - ნათქვამია ანგარიშში.

ანგარიშში ნათქვამია, რომ საჭიროა მტკიცე ნაბიჯების გადადგმა, რათა გაიზარდოს პროკურატურის ანგარიშვალდებულება და მიუკერძოებლობა. ანგარიშში ყურადღება გამახვილებულია ასევე მოსამართლეებზე ზეწოლის ფაქტებთან დაკავშირებით გახმაურებულ სასამართლო პროცესებზე და მაგალითად მოყვანილია გიგი უგულავას საქმე, საკონსტიტუციო სასამართლოს მოსამართლეებსა და მათ ოჯახზე განხორციელებული ზეწოლა, რაც მოქალაქეების მიერ მათ სახლებთან აქციების გამართვით, შეურაცხყოფითა და მუქარით გამოიხატებოდა.

„კომისარი შეშფოთებულია იმ პოლიტიკურად მოტივირებული ზომების გამო, რომელიც ოპოზიციის წევრების მიმართ ტარდება. განსაკუთრებით მათ წინააღმდეგ წინასწარი დაკავების მექანიზმის გამოყენებასთან დაკავშირებით“ - აღნიშნულია დოკუმენტში.

სასამართლო სისტემაზე ზეოლის კიდევ ერთ ფაქტად მოყვანილია რუსთავი 2-ის საქმე.

"პროცესმა უამრავი კრიტიკული შენიშვნა გამოიწვია. კომისართან მოსაუბრეთა უმეტესობა კი ნეგატიურად აფასებდა არხის სარედაქციო პოლიტიკაში ჩარევას. კომისარი ასევე აღნიშნავს, რომ ხელისუფლებამ უნდა უზრუვნეყოს მოსამართლეთა სამუშაო პირობები" - ხაზგასმულია დოკუმენტში.

გარდა ამისა, კომისარი მოუწოდებს საქართველოს ხელისუფლებას , უზრუნველყონ სექსუალური ორიენტაციის, გენდერული იდენტობისა და რელიგიური ჯგუფების დაცვის საკითხი და შესაბამისი რეაგირება მოახდინონ სიძულვილის ენაზე.