აფხაზეთი რუსეთის მიერ თურქეთის წინააღმდეგ დაწესებულ სანქციებს უერთდება

პოლიტიკა - 10:31, 12 Jan, 2016

3500

აფხაზეთის დე ფაქტო ხელისუფლება რუსეთის მიერ თურქეთის წინააღმდეგ დაწესებულ სანქციებს უერთდება.

ამის შესახებ აფხაზეთის ე.წ. მთავრობის ვებგვერდზე გამოქვეყნებულ განცხადებაშია საუბარი, რომლის თანახმად 20 იანვრისთვის სხვადასხვა დეპარტამენტებმა შესაძლო შემზღუდველი ზომების სია უნდა მოამზადოს.

უფრო კონკრეტულად, ე.წ. აფხაზეთის რესპუბლიკის დე ფაქტო ხელისუფლება გარკვეულ თურქულ საქონელზე იმპორტსა და თურქული კომპანიების საქმიანობის შეზღუდვას გეგმავს.

განცხადებაში ნათქვამია, რომ ასეთი გადაწყვეტილება „2014 წელს აფხაზეთ-რუსეთ შორის, სტრატეგიული პარტნიორობისა და მოკავშირეობის შესახებ ხელშეკრულების“ შესაბამისად გახდა მიღებული.

შეგახსენებთ, რუსეთი ერთ-ერთი და პირველია იმ ოთხი სახელმწიფოსგან, რომელიც აფხაზეთის ე.წ. დამოუკიდებლობას აღიარებს. რუსეთის გარდა აფაზეთის ე.წ. დამოუკიდებლობას ნიკარაგუა, ვენესუელა და ნაურუ აღიარებს.

შეგახსენებთ, რუსეთმა თურქეთის წინააღმდეგ სანქციები მას შემდეგ დააწესა, რაც 2015 წლის 24 ნოემბერს საჰაერო სივრცის დარღვევისთვის, თურქეთმა რუსეთის სამხედრო თვითმფრინავი სუ-24 რამდენიმე გაფრთხილების შემდეგ ჩამოაგდო. ოფიციალური მოსკოვი თურქეთის საზღვრის დარღვევას უარყოფს. პუტინის თქმით, ეს შემთხვევა იყო "ტერორისტების თანამზრახველების მიერ ზურგში განხორციელებული დარტყმაა". მისივე განცხადებით, აღნიშნული ქმედება რუსეთ-თურქეთის ურთიერთობაზე სერიოზულ გავლენას იქონიებს. რუსეთმა თურქეთთან სამხედრო კონტაქტები უკვე გაწყვიტა და უვიზო რეჟიმიც გააუქმა. ბოსტნეულის, ხილის, ნედლეულისა და მრეწველობის პროდუქცია რუსეთში 2016 წლის 1-ელი იანვრიდან ვეღარ შევა. ასევე, თურქულ კომპანიებს რუსეთში საქმიანობის უფლებაც აეკრძალათ.