პარლამენტის ვიცე-სპიკერი მანანა კობახიძე პარტია „ქართული ოცნების“ გადახალისებასთან დაკავშირებით ირაკლი კობახიძის განცხადებას ეხმაურება.

მისი თქმით, საარჩევნო სიის გადახალისება მოხდება, თუმცა დეპუტატის განცხადებით არასწორი იქნება მიდგომა, რომ პარლამენტში მოსახვედრი ადამიანები პროფესიის მიხედვით შეირჩნენ.

„ახალი სახეებიც საჭიროა. სიის გადახალისება ნამდვილად მოხდება, მაგრამ პირდაპირ გამიჯვნა, რომელი პროფესიის ადამიანები უნდა იყვნენ, ეს მთლად სწორი მიდგომა არ არის.

ბუნებრივია, თუკი კანონშემოქმედებაში ჩართული ბევრი ეკონომისტი, ბევრი ფინანსისტი იქნება, ეს სახარბიელო, მისაღები და კარგია, მაგრამ ზღვარს ნუ გავავლებთ და მიჯნას ნუ გავაკეთებთ, ვინ უნდა იყოს და ვინ არა, იმიტომ, რომ ყველა პროფესიას თანაბრად ვცემ პატივს. ვფიქრობ, რომ ყველა ადამიანს აქვს უფლება საკანონმდებლო ორგანოში იყოს წარმომადგენელი ხალხის“, - განაცხადა კობახიძემ.