,,არ მეგულება ქვეყანა, სადაც სამი ვერტმფრენით გადაადგილდება მინისტრი საკუთარი ქვეყნის ტერიტორიაზე"

პოლიტიკა - 16:18, 11 Jan, 2016

5634

თავდაცვის ყოფილი მინისტრი დიმიტრი შაშკინი მიუღებელს უწოდებს პანკისის ხეობაში მინისტრების სამხედრო ვერტმფრენით ჩასვლის ფაქტს.

ამის შესახებ შაშკინმა „ნიუპოსტთან“ საუბრისას განაცხადა.

ექსმინისტრი იმედოვნებს, რომ ეს ყველაფერი მოსახლეობის დაშინებისთვის არ იყო გამიზნული.

„სამი სამხედრო ვერტმფრენის გამოყენება მინისტრების ჩასაყვანად ჩვენი ქვეყნის ტერიტორიაზე მიუღებელია. თუ ჩვენ ვინმეს რამით ვაშინებთ, მაშინ ვთქვათ, რომ ვცდილობთ დავაშინოთ ჩვენი მოსახლეობა. იმედია ამის მიზანი არ იყო ვინმეს დაშინება. თუ ეს იყო სუფთა პრაქტიკული გადაწყვეტილება, რომ მინისტრები მალე ჩასულიყვნენ პანკისში, შევახსენებ მათ, რომ არის 18 ადგილიანი „სუპერ პუმა“, რომელიც განკუთვნილია, რომ ადამიანების დიდი მასა დანიშნულ ადგილზე სწრაფად გადაიყვანოს. არ მეგულება ქვეყანა, სადაც სამი ვერტმფრენით გადაადგილდება მინისტრი საკუთარი ქვეყნის ტერიტორიაზე. ეს არის მიუღებელი სუფთა პრაქტიკული და სუფთა კომუნიკაციური თვალსაზრისით. თუ ჩვენ ესეთი კომუნიკაცია გვაქვს ჩვენს მოსახლეობასთან, რომ ჩვენი მინისტრები ადგილზე სამხედრო ვერტმფრენებით ჩაგვყავს, ეს არასწორია. იმედია არავის ესეთი „ბრძნული აზრი“ არ მოუვიდა, რომ პანკისში სამხედრო ვერტმფრენებით მოსახლეობა დაეშინებინა. თუმცა ამ შთაბეჭდილებას ტოვებს“, - ამბობს შაშკინი.

ექსმინისტრის ინფორმაციით, სამხედრო ვერტმფრენებს ფრენის ლიმიტი აქვთ და მათი გამოყენება მხოლოდ აუცილებელ შემთხვევაში უნდა მოხდეს.

„ამ ვერტმფრენებს ფრენის ლიმიტი აქვთ, შემდეგ ჩერდება და უტარდება რემონტი. ყველა ვერტმფერნს აქვს თავისი ფრენის საათი. ყოველთვის ძალიან მკაცრად ხდება კონტროლი ფრენის საათების, რომ ფრენის საათები მაქსიმალურად გამოყენებული იყოს იმ მიზნებისთვის, რისთვისაც ეს ვერტმფრენებია. ეს არის სამხედრო და სამაშველო ოპერაციები. საერთოდ კარგი იქნებოდა, რომ ჩვენმა მთავრობამ მეტი თავდადებულობა გამოიჩინოს მოსახლეობასთან ურთიერთობაში და მეტი დიდგულობა რუსეთთან ურთიერთობაში და არა პირიქით“, - განაცხადა შაშკინმა.

შეგახსენებთ, გუშინ პანკისში თავდაცვის მინისტრი, ევროინტეგრაციის საკითხებში სახელმწიფო მინისტრი და განათლების მინისტრი იმყოფებოდნენ.