"83 წლის მოხუცი პატრიარქი მეტროს ჩასასვლელში, მიწისქვეშა გადასასვლელში გაიყინა..."

სოც.მედია - 17:30, 05 Jan, 2016

33004

პოეტმა რატი ამაღლობელმა ფეისბუკზე ახალი ლექსი გამოაქვეყნა, რომელსაც „პიეტა მიწისქვეშა გადასასვლელში“ ჰქვია. იმ ფონზე, როდესაც თბილისში გაუსაძლისი ყინვებია და უსახლკარო ადამიანებს გაყინვის საფრთხე ემუქრებათ, ლექსმა განსაკუთრებული გამოხმაურება გამოიწვია.
პოეტი სოციალურ ქსელში წერს, რომ ეს პოეტური ტექსტია და არა ახალი ამბების სააგენტოს მიერ გავრცელებული ნიუსი და ამ ლექსის მიზანი ვინმესკენ ხელის გაშვერა და დადანაშაულება არაა. მიუხედავად ყოველივე ამისა, იმის გამო რომ ლექსი სოც ქსელში პატრიარქის იუბილედან მეორე დღეს გამოქვეყნდა, მან საზოგადოების გარკვეული ნაწილის გულისწყრომა გამოიწვია.

„პიეტა მიწისქვეშა გადასასვლელში“

პატრიარქი გაიყინა,
საკუთარ დაბადების დღეზე გაიყინა,
83 წლის მოხუცი პატრიარქი
მეტროს ჩასასვლელში,
მიწისქვეშა გადასასვლელში
გაიყინა.

დიახაც, მე მიყვარს პატრიარქი
ჩემი გაყინული პატრიარქი,
მიწისქვეშეთის მისადგომებთან
წაქცეული.

უცხო, უცნობი, განდევნილი,
როგორც პირველი ქრისტიანი,
მე მიყვარს პატრიარქი
მეტროს ჩასასვლელში გაყინული.

მას არავინ მიულოცავს
დაბადების დღეს,
არავინ უმღერებს ოდებს.

დაე, დატირება, ეს მცირე დატირება
წაგყვეს უწმინდესო იქ,
სადაც მართალნი განისვენებენ.