ზუგდიდის საკრებულოს წევრები, ფრაქცია „ნაციონალური მოძრაობიდან" ბათლომე შელია და ანი წითლიძე უხვი ნალექის შემდეგ ქალაქში შექმნილი ვითარების შესახებ სოციალურ ქსელში წერენ.

დეპუტატები მოსახლეობას, ქუჩების გაწმენდით სამუშაოებში მონაწილეობის მიღებისკენ მოუწოდებენ, რათა საქმე „მხოლოდ ხელისუფლებას არ შეატოვონ“.

ბათლომე შელია: ძალიან დიდი თოვლი მოვიდა ჩვენს ქალაქში. ისეთი, როგორიც ძნელად გასახსენებელია ნებისმიერი თაობისთვის...

დღეს, ჩვენი ქალაქი დიდთოვლობას ებრძვის და არ ვიქნებით მართლები, თუ ამ ბრძოლას მხოლოდ ხელისუფლების შესაძლებლობებს შევატოვებთ...

ვერ იქნებოდა ხელისუფლება ამისთვის მზად... არ ვართ ჩვენ ციმბირის რიგითი ქალაქი, რომ წინასწარ, წლის დასაწყისში განვსაზღვროთ ასეთი მოვლენა...

ამიტომ ყველას, ვისთვისაც ქალაქის ინტერესები ბევრად მნიშვნელოვანია, ვიდრე პოლიტიკური შეხედულებები, ვთხოვ და მოვუწოდებ დილიდან გამოვიდეთ ქალაქში და თუნდაც ერთი ხე, ან ერთი უმწეო ოჯახი, თოვლის ჭარბი მასისგან დავიხსნათ...

ანი წითლიძე: ხვალ სამეგრელოს განვითარების ცენტრის მოხალისეთა ჯგუფი ქალაქში გავა და დაეხმარება ადგილობრივ ხელისუფლებას გზის გაწმენდაში.

გამოდით ყველა და ერთად გავწმინდოთ თოვლისგან ქალაქი. მოქალაქეობრივი პასუხისმგებლობა ყველამ უნდა აიღოს საკუთარ თავზე, მხოლოდ ხელისუფლებას შეატოვო არ შეიძლება.