არჩევნები და რუსთავი 2-ის საქმე - "რატომ სჭირდება ივანიშვილს მურუსიძე?"

პოლიტიკა - 18:29, 04 Jan, 2016

3105

იუსტიციის უმაღლესი საბჭოს მიერ არჩეული 38 მოსამართლე დღეს მუშაობას შეუდგა. მათ შორის არის ახლადდანიშნული 8 მოსამართლეც, რომლებმც დღეს ფიცი დადეს. 38 მოსამართლეს შორის არის სკანდალური ლევან მურუსიძეც. სწორედ მის დანიშვნას აპროტესტებს საზოგადოებისა და პოლიტიკოსების დიდი ნაწილი.

პარტია თავისუფალი საქართველოს თავმჯდომარემ კახა კუკავა აცხადებს, რომ სასამართლო რეფორმას კოსმეტიკა ვერ უშველის.

„თეა წულუკიანის რეფორმა ძალიან ჰგაქვს იმას, როდესაც მახინჯი ქალი ისვამს პომადას და კიდევ კოსმეტიკას სახეზე, მაგრამ კოსმეტიკამ არ შეიძლება ამას რაიმე უშველოს. სისტემა როდესაც არის მახინჯი და რაღაც უმნიშვნელო წესებს ცვლი, რომ ხუთი წლის მაგივრად, მოსამართლის უფლებამოსილების ვადა გახდა სამი წელი ჰქონდეს და რაღაც მსგავსი ცვლილებები ამას არ შველის. ჩვენ სასამართლო სისტემას სჭირდება ძირეული რეფორმა,“ - აცხადებს კახა კუკავა.

ნაციონალურ მოძრაობა პროცესს მოახლოვებულ არჩევნებსა და რუსთავი 2-ის საქმეს უკავშირებს.

„ივანიშვილმა მხარი დაუჭირა მურუსიძეს ზოგადად იმ პროცესს, რომელიც მიმდინარეობს სასამართლოში. სამმა არამოსამართლე წევრმა, რომელიც აირჩია ქართულმა ოცნებამ იუსტიციის საბჭოში მხარი დაუჭირა სწორედ ამ პროცესს, რომელიც მიზნად ისახავს სასამართლო სისტემის ჩამოშლას. ეს არის კიდეცქართული ოცნების მიზანი, რადგან მათ სურთ სასამართლო სისტემა ჩაიგდონ ხელში და მოახდინონ სასამართლოთი მანიპულირება პროცესებზე. სასურველი განაჩენები გამოიტანოს სასამართლომ, მათ შორის საარჩევნო სისტემაზე და რუსთავი 2-ის საქმეზე,“ - განაცხადა აკაკი მინაშვილმა.

"მურუსიძის პატრონი არის ბიძინა ივანიშვილი" - ასე შეაფასა ახალი მემარჯვენეების ლიდერმა მამუკა კაციტაძემ დღეს 8 მოსამართლის ფიცის დადების ფაქტი, მათ შორის ლევან მურუსიძის დანიშვნაც.

„რატომ სჭირდება ივანიშვილს მურუსიძე? იმიტომ, რომ მურუსიძე და მისნაირი ადამინები არიან წამსვლელები ყველაფერზე და ყველაფერზე ხელისმომწერები. 2016 წელს რატომ შეიძლება დაგჭირდეს ასეთი მოსამართლე? იმიტომ, რომ ეს არის საარჩევნო წელი და იმიტომ, რომ რუსთავი 2-ის თემა გაქვს მოსაგვარებელი,“ - განაცხადა მამუკა კაციტაძემ.