საარჩევნო კოდექსზე მომუშავე ინტერპარტიული ჯგუფის მიმართვა პრემიერს

საარჩევნო კოდექსზე მომუშავე ინტერპარტიული ჯგუფის მიმართვა პრემიერს - რას გადაწყვეტს კვირიკაშვილი

პოლიტიკა - 15:43, 04 Jan, 2016

1753

საარჩევნო გარემოს გაუმჯობესებაზე მომუშავე ოპოზიციის ინტერპარტიული ჯგუფი საქართველოს პრემიერ-მინისტრ გიორგი გიორგი კვირიკაშვილს სპეციალური წერილით მიმართავს და მასთან შეხვედრის მზადყოფნას გამოთქვამს.
ინტერპარტიული ჯგუფის მიერ დღეს მიღებულ მიმართვაში საუბარია, რომ საარჩევნო რეფორმის განვითარების შემდგომი პროცესის განსახილველად ოპოზიცია შეხვედრისთვის მზად არის.
"ჩვენ, საარჩევნო გარემოს გაუმჯობესებაზე მომუშავე ოპოზიციის ინტერპარტიული ჯგუფის ქვემეორე ხელმომწერი პოლიტიკური გაერთიანებები მივესალმებით თქვენს დიდ სურვილს ჩვენი ქვეყნის ძალიან მნიშვნელოვანი გადაწყვეტილებების მიღების დროს მაქსიმალური ჩართულობის უზრუნველყოფის შესახებ. ასევე თქვენს მზადყოფნას უახლოეს მომავალში დაიწყოს შეხვედრები საზოგადოების სხვადასხვა ფენების წარმომადგენლებთან, მათ შორის ბიზნესწრეებთან და არასამთავრობო სექტორთან. ზემოთქმულიდან და საკითხის გადაუდებლობიდან გამომდინარე გამოვთქვამთ მზადყოფნას თქვენთან შესახვედრად საარჩევნო რეფორმის განვითარების შემდგომი პროცესის განსახილველად, - ნათქვამია მიმართვაში, რომელსაც ხელს აწერენ: "ახალი მემარჯვენეები", "გაერთიანებული დემოკრატიული მოძრაობა", "ეროვნულ-დემოკრატიული პარტია", "თავისუფლება", "თავისუფალი საქართველო", "რეფორმატორები", "სამოქალაქო ალიანსი თავისუფლებისათვის", "ევროპელი დემოკრატები", "ლეიბორისტული პარტია", "პატრიოტთა ალიანსი", "ძალოვან ვეტერანთა და პატრიოტთა პოლიტიკური მოძრაობა", "ტრადიციონალისტთა კავშირი" და "ქრისტიან-დემოკრატიული პარტია".
ოპოზიციის წევრები იმედს გამოთქვამენ, რომ გიორგი კვირიკაშვილს ექნება უფრო კონსტრუქციული თანამშრომლობა ოპოზიციასთან, ვიდრე ეს მის წინამორბედს ჰქონდა.
კვირიკაშვილისთვის გაგზავნილი მიმართვის შესახებ "თბილისი მერიოტში" შეკრებილ ჟურნალისტებთან კომენტარი გააკეთა მამუკა კაციტაძემ.
"ოპოზიციის ინტერპარტიული ჯგუფის წარმომადგენლები ჩამოვყალიბდით, რომ შესაძლებლად მოკლე დროში შევხვდეთ ახალ პრემიერ-მინისტრს, რომელიც არის უმაღლესი თანამდებობის პირი, მთავრობის ხელმძღვანელი, ხოლო მთავრობა არის პასუხისმგებელი არჩევნების ჩატარებაზე. რაც შეეხება იმას, თუ რა წინადადება გვექნება მასთან, ეს კონკრეტიკა იქნება შეხვედრის დროს" - განაცხადა მამუკა კაციტაძემ.
ინტერპარტიული ჯგუფის წევრები ხაზგასმით აღნიშნავენ, რომ , არჩევნებამდე საკმარისი დრო რჩება საარჩევნო კოდექსში და კონსტიტუციაში შესაბამისი ცვლილებების გატარებისთვის.