"თავისუფალი დემოკრატების" ლიდერი ირაკლი ალასანია მთავრობაში განხორციელებულ ცვლილებებს პოზიტიურად აფასებს.

იგი იმ მიზეზებს განმარტავს, რის გამოც ფრაქცია "თავისუფალმა დემოკრატებმა" მთავრობას ნდობა გამოუცხადა.

"მთავრობას ნდობა იმ მიზეზით არ გამოვუცხადეთ, რომ ოპოზიცია ამ მთავრობაზე პასუხისმგებლობას ვერ აიღებს. თუმცა, დიახ, გიორგი კვირიკაშვილს ვენდობით და მზად ვართ, საჭიროების შემთხვევაში რჩევებიც მივცეთ, რომ საზოგადოების გაუსაძლისი სოციალურ-ეკონომიკური მდგომარეობა ოდნავ მაინც გაუმჯობესდეს. ვფიქრობ, გიორგი კვირიკაშვილის მთავარი გამოწვევა საპარლამენტო არჩევნებამდე ქვეყნის სტაბილურად და მშვიდად მიყვანაა. მჯერა, ის დაუფიქრებელ გადაწყვეტილებებს არ მიიღებს და არც პოლიტიკურ დაკვეთებს არ შეასრულებს, პოლიტიკურ პროცესებში სამართალდამცავი სტრუქტურების ჩართვას ვგულისხმობ", - განაცხადა ირაკლი ალასანიამ „კვირის პალიტრასთან“ ინტერვიუში.

რაც შეეხება ირაკლი ღარიბაშვილის თანამდებობიდან წასვლას, ალასანიას თქმით, ეს მისთვის მოულოდნელი იყო.

"წაქცეულზე ლაპარაკი არ მიყვარს, მაგრამ აშკარად გამოჩნდა, რომ პრემიერ-მინისტრის პოსტიდან წასვლა ირაკლი ღარიბაშვილისთვისაც მოულოდნელი იყო. ბევრი რამ ერთად გავაკეთეთ, მაგრამ არაერთი მნიშვნელოვანი საქმის ხორცშესხმა არ გამოგვივიდა, რაზეც გულნატკენი ვარ. არ მინდა ახალ წელს ამაზე ვილაპარაკო, მას ახლა თავისი გზა აქვს", -აღნიშნა ალასანიამ.