რესტორანში მოქეიფე პროკურატურა და დაჯარიმებული გლეხები

პოლიტიკა - 15:15, 31 Dec, 2015

13200

ინცინდენტში მონაწილე ნატანებელ გლეხებს პროკურატურა 1000 ლარიანი ჯარიმის სანაცვლოდ განრიდებას სთავაზობს.

იმ გლეხებს, რომლებიც, მიმდინარე წლის 12 დეკემბერს, ოზურგეთის მუნიციპალიტეტის სოფელ ზემო ნატანებში მომხდარ ინცინდენტში ფიგურირებენ, ოზურგეთის რაიონული პროკურატურა - განრიდების სანაცვლოდ 1000 ლარიან ჯარიმებს აკისრებს.

თუ გლეხები ჯარიმების გადახდაზე უარს იტყვიან მათზე სისხლის სამართლებრივი დევნა დაიწყება, დღეს - პროკურატურის მიერ გლეხებისადმი მიცემული ვადის ბოლო დღეა-ეს ინფორმაცია "გურიის მოამბეს" ნატანებიდან მიაწოდეს.

თავის მხრივ გლეხები, რომლებსაც ამ საახალწლოდ მითუმეტეს, 1000 ლარიანი ჯარიმის გადახდის შესაძლებლობა არა აქვთ, აცხადებენ, რომ ეს გადაწყვეტილება პროკურორებმა რესტორან "ქალაქურში" (ოზურგეთი) მიიღეს, როცა ისინი სუფრაზე იმ კომპანიის (STS-ჯგუფი) ხელმძღვანელებმა დაპატიჟეს, რომლის წარმომადგენელიც 12 დეკემბრის ინცინდენტში მონაწილეობდა.

გლეხები "გურიის მოამბეს" ამ რესტორნის ფოტოსაც აწვდიან, სადაც ოზურგეთის პროკურორები, გუბერნატორი, სპეც სამსახურების მაღალჩინოსნები-უცნობ პირებთან ერთად რესტორანში ქეიფობენ.

გლეხები ამტკიცებენ, რომ ინცინდენტი STS-ჯგუფის წარმომადგენლის სიტყვიერმა შეურაცხყოფამ გამოიწვია, როცა მან საპროტესტო აქციაზე მისულ გლეხებს დედა შეაგინა.

როგორც "ნიუპოსტს" მთავარ პროკურატურაში განუცხადეს, მომხდარზე გენერალურმა ინსპექციამ მოკვლევა დაიწყო.