რუსმა ოკუპანტებმა გალში დღეს დილით დამატებითი ძალები გადმოისროლეს. მათ გალის რაიონის დაბალი ზონის და ზედა ზონების სოფლებთან ოკუპაციის ხაზის გაკონტროლება დაევალათ. როგორც ცნობილია, მათ აფხაზური ადმინისტრაციის გამგებლისგან აქვთ ქართველი ოჯახების სიები, რომლებიც ქართული მობილური ქსელებით სარგებლობენ.

როგორც ადგილობრივები ამბობენ, სამხედროებს სწორედ ამ მობილურების ამოღება დაევალათ.

„საშინელი მდგომარეობაა. მოსახლეობა, ვისაც გალიდან ზუგდიდის ბაზარში პროდუქტი მიჰქონდა გასაყიდად დააკავეს. პროდუქტი ყველას წაართვეს. ნაწილი, ვინც გაფრთხილების საფუძველზე გაათავისუფლეს, ნაწილი რუსების ბაზაზე გადაიყვანეს. თუმცა ზუგდიდიდან გალში პროდუქტი, რაც მათ სჭირდებათ, გადის. გუშინაც, ზუგდიდიდან გალში გავიდნენ პურის ფქვილით, შაქრით და ბოსტნეულით დატვირთული ავტომობილები. მოსახლეობა დახმარებას ითხოვს, თუმცა ხელისფლებიდან არავინ გვეხმაურება“, - ამბობენ ადგილობრივები.