"თავისუფალი დემოკრატების" წევრები მოითხოვენ იუსტიციის უმაღლესი საბჭოს იმ წევრების გადადგომას მოითხოვენ, რომლებმაც ლევან მურუსიძე სააპელაციო საბჭოს მოსამართლედ აირჩიეს. აღნიშნულ საკითხთან დაკავშირებით ფრაქციის წევრებმა პეტიცია შეადგინეს.

"პარლამენტის წევრები უაღრესი შეშფოთებით ვადევნებთ თვალს ბოლო პერიოდში იუსტიციის უმაღლეს საბჭოში მიმდინარე მოვლენებს, რასაც შედეგად მოჰყვა 2015 წლის 25 დეკემბერს იუსტიციის უმაღლესი საბჭოს გადაწყვეტილება ლევან მურუსიძის თბილისის სააპელაციო სასამართლოს ადმინისტრაციულ საქმეთა პალატის მოსამართლედ გამწესების შესახებ. აღნიშნული ცალსახად შეიძლება მიჩნეულ იქნეს, როგორც დამოუკიდებელი, სამართლიანი და მიუკერძოებელი სასამართლოს დასამარება.

საზოგადოებაში გაჩნდა ეჭვი, რომ ხელისუფლება გარიგებაშია შესული "ნაციონალური მოძრაობის" დროინდელ სასამართლო სისტემაში მოღვაწე მოსამართლეებთან, რომელთა სახელებიც დაკავშირებულია გახმაურებულ საქმეებთან, მათ შორის გირგვლიანის საქმესთან. შესაბამისად, საქართველოს პარლამენტის მიერ 2013 წლის 14 ივლისს არჩეული იუსტიციის უმაღლესი საბჭოს წევრების გადაწყვეტილება უაღრესად შემაშფოთებელია მორალური, სოციალური და პოლიტიკური თვალსაზრისით. მიღებული გადაწყვეტილება აღძრავს საფუძვლიან ეჭვს სასამართლო სისტემის მმართველი პოლიტიკური ძალისგან დამოუკიდებლობის თაობაზე და საზოგადოებაში იწვევს მძაფრად უარყოფით რეაქციას.

ყოველივე ამის გამო ჩვენ, ქვემოთ ხელმოწერები, მივიჩნევთ, რომ იუსტიციის უმაღლესი საბჭოს იმ წევრებს, რომლებიც თანამდებობზე 2013 წელს აირჩია საქართველოს პარლამენტმა აღარ გააჩნიათ მორალური უფლება, დარჩნენ დაკავებულ თანამდებობებზე; ჩვენ ერთხმად და კატეგორიულად მოვუწოდებთ მათ, დაუყოვნებლად დატოვონ იუსტიციის უმაღლესი საბჭო’’,– ნათქვამია პეტიციაში.

პეტიციაზე ხელს აწერენ ფრაქცია ‘’თავისუფალი დემოკრატების’’ წევრები.