ISIS-ის ლიდერის გაქართულებული მიმართვა და დამწვარი ნაძვის ხე- რას ამბობენ პანკისში

პოლიტიკა - 13:42, 30 Dec, 2015

2871

პანკისში ჩეჩნური დიასპორის წარმომადგენელი, მექა ხანგოშვილი ტერორისტული დაჯგუფება ISIS-ის ლიდერის აბუ ბაქრ ალ-ბაღდადის მიმართვის ქართულენოვანი თარგმანი გამოაქვეყნებას „ნიუპოსტთან“ აფასებს.

„სამწუხაროდ ამ დაჯგუფებას აქვს მიზიდულობა, იმის მიუხედავად რა სისასტიკეს ჩადის ISIS-ი. ტერორისტებს საერთო არ აქვთ ისლამთან. რელიგიის ტერორიზმთან გაიგივება არასწორია, რადგან ამ ორ ცნებას საერთო არაფერი აქვს. ისინი არიან სპეცსამსახურების მიერ შექმნილი დაჯგუფება, რომელსაც ევროპამ სახელიც კი შეუცვალა და "დაეშის" წევრებად მოიხსენიებენ. რაც შეეხება უშუალოდ მიმართვას, ჩემი აზრით, ეს მოწოდება საფრთხის შემცველი არ არის. ქართულენოვანი თარგმანი ალბათ გაკეთდა იმ ქართველი მოსახლეობისთვის, რომლებიც სამწუხაროდ არჩევანს აკეთებენ და მიდიან საბრძოლველად საქართველოდან“- აღნიშნა ხანგოშვილმა.

ჩეჩნური დიასპორის წარმომადგენელი პანკისის ხეობის სოფელ დუისის ცენტრში 2 დღის წინ დადგმული ნაძვის ხის დაწვის ფაქტსაც გამოეხმაურა.

როგორც ხანგოშვილმა აღნიშნა, პანკისში ნაძვის ხე ადგილობრივების ინიციატივით, წელს პირველად დადგეს და ყველას უხაროდა.

მექა ხანგოშვილმა ახმეტის პოლიცია საქმის შესწავლისკენ მოუწოდა.

ჩეჩნური დიასპორის წარმომადგენელმა ჩვენთან საუბარში არ გამორიცხა, რომ ნაძვის ხე ვაჰაბიტებმა დაწვეს, თუმცა იქვე აღნიშნა, რომ ეს გამოძიებამ უნდა დაადგინოს.

„ასეთი ვარაუდი ნამდვილად არსებობს. აქვე მინდა აღვნიშნო, რომ ისლამი არ კრძალავს ნაძვის ხის დადგმას, მიუხედავად იმისა, რომ მუსლიმები ახალ წელს არა პირველ იანვარს, არამედ 21 მარტს აღნიშნავენ. ძალიან არ მინდა ვიფიქრო, რომ ვაჰაბიტებმა დაწვეს, გამოძიება უნდა ჩატარდეს და უნდა დადგინდეს ყველაფერი“- აღნიშნა ხანგოშვილმა „ნიუპოსტთან“ საუბრისას.