„პატრონი არ ჰყავს ამ ქვეყანას გაღარიბდა ხალხი და კიდევ უფრო გაუსაძლისი გახდა ცხოვრება"- ალასანია

პოლიტიკა - 02:26, 30 Dec, 2015

1564

თავისუფალი დემოკრატების ლიდერი, ირაკლი ალასანია, ხელისუფლების მიერ განხორციელებულ სასამართლო რეფორმას აკრიტიკებს.

„ამ რეფორმისგან მივიღეთ მურუსიძის სასამართლო და შოთაძის პროკურატურა. ემზადებიან გარემოს შესარჩევად, რომ საარჩევნო დავების შემთხვევაში სასამართლომ მიიღოს მათთვის სასურველი გადაწყვეტილება,“ - განაცხადა ირაკლი ალასანიამ.

თავისუფალი დემოკრატების ლიდერის განცხადებით, მას უმუშავია გიორგი კვირიკაშვილთან და აქვს ფრთხილი მოლოდინი, რომ ის შეეცდება, შეცვალოს არსებული ვითარება.

თავისუფალი დემოკრატები პრემიერ გიორგი კვირიკაშვილს 100-დღიან შანსს აძლევენ, რომლის შემდეგაც მასთან შეხვედრასა და 100 დღის საქმიანობის შეფასებას გეგმავენ.

ირაკლი ალასანია დღევანდელ მთავრობას აკრიტიკებს და ამბობს, რომ მას ქვეყნის განვითარების პოტენციალი არ გააჩნია.

არჩევანში სტუმრობისას ალასანიამ გასული წელიც შეაფასა და აღნიშნა, რომ ქვეყანას პატრონი არ ჰყავს.

„პატრონი არ ჰყავს ამ ქვეყანას. გაღარიბდა ხალხი და კიდევ უფრო გაუსაძლისი გახდა ცხოვრება. ბუნებრივია, ამაში თავის წვლილი ლარის დევალვაციამაც შეიტანა,“ - აცხადებს ირაკლი ალასანია.