პრემიერ-მინისტრობის კანდიდატი გიორგი კვირიკაშვილი მიიჩნევს, რომ საზოგადოებაში სტაბილურობის შეგრძნება უნდა დამკვიდრდეს და შემცირდეს პოლიტიზაცია.

ამის შესახებ კვირიკაშვილმა სამთავრობო პროგრამის წარდგენისას განაცხადა.

პრემიერობის კანდიდატმა წინა ხელისუფლებაზეც ისაუბრა. მისი თქმით, შორს არის იმ აზრისგან, რომ „ქართული ოცნების“ მთავრობას მხოლოდ უარყოფითი მემკვიდრეობა ერგო.

„ჩვენ მივედით განვითარების იმ ეტაპზე, როცა ყველაფერი უნდა გავაკეთოთ იმისათვის, რომ საზოგადოება დავაწყნაროთ, ჰქონდეს სტაბილურობის შეგრძნება. საზოგადოებაში უნდა შევამციროთ პოლიტიზაცია. გუშინ ვთქვი, რომ ჩვენ პოლიტიკოსები ნამდვილად ვიქეცით, ერთი დიდი სპექტაკლის ნაწილად, მე მაქვს შეგრძნება, რომ ჩვენ ყველანი ვართ გლადიატორები, რომლებსაც ყოველ საღამოს ტელევიზიით გვიყურებენ ჩვენი თანამოქალაქეები. მე ვფიქრობ, რომ ეს უნდა დასრულდეს. მემკვიდრეობა მარტივი არ იყო, მე შორს ვარ იმ აზრისგან, რომ ეს მემკვიდრეობა იყო მხოლოდ უარყოფითი, იყო დადებითიც მაგრამ განსაკუთრებით 2007 წლიდან მოყოლებული ძალიან მძიმე 5 წელი გავიარეთ“, - განაცხადა გიორგი კვირიკაშვილმა.