”შეშფოთებული ვარ ქვეყანაში გაზრდილი რუსული პროპაგანდის გამო”- გიორგი კვირიკაშვილი

პოლიტიკა - 21:51, 28 Dec, 2015

3331

პრემიერობის კანდიდატი ქვეყანაში პრორუსული პროპაგანდის გაზრდის გამო შეშფოთებას გამოთქვამს. თუმცა გიორგი კვირიკაშვილი არ ადასტურებს ინფორმაციას იმის შესახებ, რომ 2013-2014 წლებში პრორუსული მედია საბიუჯეტო დაფინანსებას იღებდა.

საპარლამენტო უმცირესობასთან გამართულ შეხვედრაზე გიორგი კვირიკაშვილმა განაცხადა, რომ აბსურდია იმის მტკიცება, რომ ხელისუფლება რუსულ მედიას აფინანსებს.

პარლამენტარმა სერგო რატიანმა კვირიკაშვილს უპასუხა, რომ ხელისუფლება აფინანასებს, ობიექტივს. ხოლო ეკა ხერხეულიძე მას დაპირდა, რომ გაუგზავნის კვლევის შედეგებს, რომელიც ადასტურებს, რომ პრორუსული მედია საქართველოს ხელისუფლებისგან ფინანსდება.

“თუ შეიძლება გამოიგზავნეთ, მაგრამ ეს არის აბსურდი. დადასტურებულად შემიძლია გითხრათ. მე თითონ შეშფოთებული ვარ ქვეყანაში გაზრდილი რუსული პროპაგანდის გამო. ეს არის ჩემი პირადი დამოკიდებულება”, – განაცხადა გიორგი კვირიკაშვილმა.

პრორუსული მედიის ხელისუფლების მხრიდან დაფინანსებაზე კვლევა მედიის განვითარების ფონდმა ჩაატარა, რომლის თანახმად იმ მედიებს, რომლებიც გამოირჩევიან ანტიდასავლური პოლიტიკით, 2013-14 წლებში საბიუჯეტო დაფინანასება აქვთ მიღებული.