მინისტრთა კაბინეტის მომავალი წევრები პარლამენტში იკრიბებიან. მათ დღეს კანონმდებლებს საკუთარი უწყების პრიორიტეტები უნდა გააცნონ. მანამდე მინისტრის მოვალეობის შემსრულებლებმა ჟურნალისტებთან კომენტარი გააკეთეს და განსახორციელებელ რეფორმებზე ისაუბრეს.

როგორც დავით სერგეენკო ამბობს, მომავალ წელს ჯანდაცვის სამინისტრო მომსახურების გაზრდაზე იქნება ორიენტირებული.

„გარდა დამტკიცებული ძირითადი სტრატეგიული პროექტებისა, ჩვენ შეგვეძლება მომავალი წლიდან შევთავაზოთ ახალი ცვლილებები მოსახლეობას, რომელიც მათ კიდევ უფრო დიდ შვებას მისცემს. ეს იქნება რეფორმები ჯანდაცვაში, რომელიც გაზრდის მომსახურების ხარისხს და ამბულატორიულ მედიკამენტებთან წვდომას. მნიშვნელოვანი სიახლეები იქნება ონკოლოგიის მიმართულებითაც“, - განაცხადა სერგეენკომ.

დიმიტრი ქუმსიშვილის თქმით, ეკონომიკის სამინისტროს მთავარი პრიორიტეტები არის და დარჩება კერძო სექტორზე ორიენტირებულობა.

„კერძო სექტორი ჩვენი ეკონომიკის მამოძრავებელია და მათი სტიმულირება, როგორც პოლიტიკის დონეზე, ასევე ინსტრუმენტების დონეზე ჩვენი ძირითადი ამოცანა იქნება. ჩვენ, როგორც ვაჭრობის პოლიტიკის გამტარებელი უწყება, ძალისხმევას არ დავიშურებთ, რომ რაც შეიძლება მეტი რეფერენცირებული სავაჭრო რეჟიმები მოვიპოვოთ სხვადასხვა ქვეყნებიდან“, - განაცხადა ქუმსიშვილმა.

დავით ბაქრაძის თქმით, მთავრობა რომელსაც პარლამენტი დაამტკიცებს, მთლიანად შედეგზე იქნება ორიენტირებული.

"ეჭვი არ მეპარება, რომ ეს იქნება პროდუქტიულ შედეგზე ორიენტირებული მთავრობა, ისევე როგორც აქამდე. ჩვენ ევროპული და ევროატლანტიკური მიმართულებით ვაჩვენეთ ძალიან კარგი შედეგები. რაც შეეხება ასოცირების შეთანხმებას, თავისუფალ ვაჭრობას, ამ უმნიშვნელოვანესი დოკუმეტების თანამიმდევრულ შესრულებას ვაგრძელებთ", - განაცხადა დავით ბაქრაძემ.

ოთარ დანელიას თქმით, სოფლის მეურნეობის სამინისტროში პრიორიტეტები ნარჩუნდება, თუმცა გარკვეული სიახლეებიცაა.

„ჩვენი მიმართულებით პრიორიტეტები ნარჩუნდება, თუმცა იქნება რამოდენიმე სიახლე, ეს გახლავთ სოფლის განვითარების კომპონენტი, კლიმატგონივრული სოფლის მეურნეობა, ეს არის კოოპერირების კიდევ უფრო წახალისება და მათ შორის ინფრასტრუქტურული პროექტები, როგორიც არის სამაცივრე და შემნახველი მეურნეობები“, - აღნიშნა დანელიამ.

სამომავლო გეგმებზე კომენტარი ფინანსთა მინისტრობის კანდიდატმა ნოდარ ხადურმაც გააკეთა.

„გაგავრძელებთ მუშაობას, რათა ბიზნესგარემო უკეთესი იყოს და შევქმნათ პირობები, რომ ფისკალური ინსტიტუტები მუშაობდნენ გამართულად, გაგრძელდეს ბიუჯეტის გამჭირვალედ ხარჯვა და ჩვენი პრიორიტეტები, რომელიც გაცხადებული იყო, შესრულდეს“, - განაცხადა ხადურმა.

მინისტრთა ახალი კაბინეტს კენჭს ხვალ უყრიან. გიორგი კვირიკაშვილმა მინისტრთა კაბინეტის შემადგენლობა უცვლელი დატოვა. სიახლე მხოლოდ საგარეო საქმეთა მინისტრია. ქვეყნის პირველი დიპლომატის პოსტს მიხეილ ჯანელიძე დაიკავებს.