პრეზიდენტის განცხადება არის ზეწოლა სასამართლოზე

პრეზიდენტის განცხადება არის ზეწოლა სასამართლოზე - მურუსიძე

პოლიტიკა - 15:37, 25 Dec, 2015

1769

სააპელაციო სასამართლოს ადმინისტრაციული პალატის მოსამართლედ არჩეული ლევან მურუსიძე, მის არჩევასთან დაკავშირებით პრეზიდენტის მიერ გაკეთებულ განცხადებას სასამართლოს დამოუკიდებლობის შეზღუდვად აფასებს და გიორგი მარგველაშვილს კონსტიტუციის დაცვისკენ მოუწოდებს:

„მე როგორც იუსტიციის უმაღლესი საბჭოს მდივანმა მინდა განვაცხადო, რომ ხელში მიჭირავს საქართველოს კონსტიტუცია, რომელიც მოსამართლეებს პრეზიდენტმა გამოგვიგზავნა, ამ კონსტიტუციაში საუბარია ხელისუფლების დანაწილების პრინციპზე და ჩემი სურვილი იქნებოდა , რომ ეს რეალურად განხორციელებულიყო და ქაღალდზე არ დარჩენილიყო, როდესაც კენჭისყრები დასრულებული არ არის, პრეზიდენტის გამოსვლა და კენჭისყრების შეფასება არის ზეწოლა სასამართლო ხელისუფლებაზე. როდესაც 2013 წელს ამირჩიეს იუსტიციის უმაღლესი საბჭოს მდივნად, მაშინაც მქონდა განხილული გირგვლიანის საქმე, მაშინ პრეზიდენტს ასევე ეკავა ძალზედ მნიშვნელოვანი თანამდებობა. თუმცა, არც მას და არც სხვას არ გახსენებია აღნიშნული საქმე. არავის არ გამოუხატავს მძაფრი პროტესტი იმასთან დაკავშირებით, რომ ლევან მურუსიძე არჩეულიყო იუსტიციის უმაღლესი საბჭოს მდივნად. ამიტომ ჩემი მოწოდებაა, რომ სასამართლო არის დამოუკიდებელი სისტემა, ის თავად იღებს გადაწყვეტილებებს და, შესაბამისად, ყველამ უნდა სცეს პატივი მე მინდა ვისარგებლო შემთხვევით და იუსტიციის საბჭოს წევრებს მინდა მადლობა გადავუხადო, რომლებმაც ზეწოლას გაუძლეს და მიიღეს გადაწყვეტილება, რომელიც ემსახურება სასამართლოს ინტერესებს.“- განაცხადა ლევან მურუსიძემ დღეს გამართულ სპეციალურ ბრიფინგზე.

შეგახსენებთ დღეს საქარტველოს პრეზიდენტი მურუსიძის არჩევას გამოეხმაურა, პრეზიდენტის თქმით მურუსიძის მიერ მიღებულმა გადაწყბვეტილებებმა არა მარტო ქართულ საზოგადოებაში გამოიწვია პროტესტი, არამედ გამაოგნებელი იყო სტრასბურგის სასამართლოსთვისაც. პრეზიდენტის თქმით, ის სამართლიანი სასამართლოს შესაქმნელად ბრძოლას აგრძელებს:

"ასეთი გადაწყვეტილების მიმართ ქართული საზოგადოების მიუღებლობა განსაკუთრებით ნათლად გამოჩნდა. ეს მიუღებლობა ყალიბდებოდა წლების განმავლობაში გამომდინარე იმ საქმეებიდან, რომელმაც არა მარტო გააერთიანა ქართული საზოგადოება, არამედ გამაოგნებელი იყო სტრასბურგის სასამართლოსთვის. ბრძოლა სამართლიანი სასამართლოს შესაქმნელად გრძელდება და მე ამ ბრძოლას ბოლომდე მივიყვან"- განაცხადა მარგველაშვილმა.