სახალხო დამცველის აპარატის წარმომადგენლები ადასტურებენ, რომ ქმარ-შვილის მკვლელობაში ბრალდებულ მაგდა პაპიძეს სხეულზე დაზიანებები აღენიშნება. ომბუდსმენის წარმომადგენლები დაკავებულის მოსანახულებლად გუშინ მივიდნენ.

თუმცა როგორც ომბუდსმენის მოადგილე ნათია კაციტაძე ამბობს, დასადგენია რისგან არის გამოწვეული დაზიანებები.

„ჩვენი შესწავლის შედეგად ამ ეტაპზე დოკუმენტალურად დასტურდება რომ მას დაკავების დროს დაზიანებები ჰქონდა თუმცა რის შედეგად მიიღო დაზიანებები, ეს დასადგენია. ეს უნდა დაადგინოს გამოძიებამ“, - განაცხადა ნათია კაციტაძემ.

ბრალდებულმა ორი დღის წინ სასამართლო პროცესზე განაცხადა, რომ მას დაკავების დროს პოლიციელებმა ფიზიკური და სიტყვიერი შეურაცხყოფა მიაყენეს. მისი განცხადების საფუძველზე მთავარმა პროკურატურამ გამოძიება უკვე დაიწყო.

შეგახსენებთ, მაგდა პაპიძეს არასრულწლოვანი შვილის და მეუღლის განზრახ მკვლელობა ედება ბრალად.