შავი ღრუბლები ღარიბაშვილის თავზე - "15 %- იანმა პარტიამ მეთაური უნდა შეცვალოს"

პოლიტიკა - 14:13, 24 Dec, 2015

2351

ექსპერტ ხათუნა ლაგაზიძის განცხადებით, ირაკლი ღარიბაშვილს გადადგომის ბევრი მიზეზი დაუგროვდა.
როგორც მან თემის კომენტირებისას აღნიშნა, ღარიბაშვილის მოხსნასთან დაკავშირებით კითხვები არ აქვს.
"მთავრობის გადადგომის მიზეზები საკმარისზე მეტია. ღარიბაშვილის გადადგომაზე საუბარი ჯერ კიდევ მაშინ დაიწყო, როცა მისი ოჯახის წევრები და ნათესავები გაათავისუფლეს სახელმწიფო თანამდებობებიდან. შემდეგი ეტაპი, როცა ღარიბაშვილის თავზე შავი ღრუბლები შეიკრიბა, იყო ლარის კურსთან დაკავშირებული საკითხები, ბოლოს კი აღმასრულებელი ხელისუფლება ძალიან ცუდად გამოჩნდა მოსამართლეების დანიშვნის საქმეში. მოგეხსენებათ, ხვალ არის კენჭისყრა სააპელაციო სასამართლოში, მოსამართლეთა დანიშვნის შესახებ და ძალიან ბევრს საუბრობენ ხელისუფლების ინტერესზე ამ პროცესში. შეიძლება ესეც იყო ერთ-ერთი მიზეზი, რის გამოც დაჩქარდა ღარიბაშვილის გადადგომა"- აღნიშნა ექსპერტმა.
ლაგაზიძე ყოფილი პრემიერის გადადგომას ხელისუფლების დაბალ რეიტინგსაც უკავშირებს.
"ხელისუფლება, რომელიც რეიტინგს კარგავს 15%-მდე, მისი მეთაური უნდა შეიცვალოს. ასე, რომ ღარიბაშვილის მოხსნასთან დაკავშირებით, კითხვები არ მაქვს. უფრო მეტიც, ეს პროცესი დაგვიანებულია"- აღნიშნა ხათუნა ლაგაზიძემ.