ვრცელდება ინფორმაცია, რომ მინისტრთა კაბინეტში რამდენიმე ცვლილება განხორციელდება. როგორც ცნობილია, ცვლილება უმეტესად ეკონომიკურ გუნდს შეეხება.

არსებული ინფორმაციით, ფინანსთა მინისტრის პოსტზე ნოდარ ხადურს დიმიტრი ქუმსიშვილი ჩაიბარებს, ხოლო ეკონომიკის მინისტრის პოსტზე „საქართველოს რკინიგზის“ გენერალურ დირექტორის მამუკა ბახტაძის და ბიზნესომბუდსმენის გიორგი გახარიას კანდიდატურა განიხილება.

რაც შეეხება საგარეო საქმეთა მინისტრის პოსტს, ცნობილია, რომ მას მინისტრის პირველი მოადგილე მიხეილ ჯანელიძე ჩაიბარებს. რაც შეეხება პრემიერ-მინისტრის თანამდებობას, არსებული ცნობით, მას გიორგი კვირიკაშვილი დაიკავებს.

გავრცელებული ინფორმაციით, ახალ მინისტრთა კაბინეტში აღარ მოხვდებიან თამარ სანიკიძე, ნოდარ ხადური და პაატა ზაქარეიშვილი.

შეგახსენებთ, საქართველოს პრემიერ-მინისტრმა ირაკლი ღარიბაშვილმა თანამდებობა გუშინ დატოვა. ამის შემდეგ მინისტრთა კაბინეტის ყველა წევრს უფლებამოსილება შეუწყდა.