ბათუმის შოთა რუსთაველის სახელობის უნივერსიტეტში ბულვარის განვითარების კონცეფციის მორიგ საჯარო განხილვას დაპირისპირება მოხდა.

ერთმანეთს ჯერ სიტყვიერად, შემდეგ კი ფიზიკურად უმაღლესი საბჭოს დეპუტატი დავით ბაციკაძე და მოქალაქე ჯელალ ქიქავა დაუპირისპირდნენ.

„იმდენად თავხედობთ, რომ ბულვარს შეეხეთ. ბენდუქიძე არ შეეხო მას, მიშა არ შეეხო, თქვენ ეხებით.შენ ამ ქალაქში ვერ იცხოვრებ, ეს ხელისუფლება წავა“, - მიმართა მოქალაქემ დავით ბაციკაძეს. სწორედ ამან გამოიწვია დეპუტატის გაღიზიანება, რასაც დაპირისპირება მოჰყბა.

ბულვარის განვითარების კონცეფციის განხილვა 3 საათზე მეტ ხანს გაგრძელდა. საზოგადოების დიდმა ნაწილმა პროტესტის ნიშნად დარბაზი დატოვა.

შეგახსენებთ, ბათუმის ბულვარის ადმინისტრაციამ ბულვარის განვითარების კონცეფციის პროექტზე მუშაობა დაიწყო. ბულვარს თავის ისტორიაში პირველად განვითარების გეგმა ექნება. ახალი დოკუმენტი ბულვარის სამომავლო განვითარების პერსპექტივებს, კონკრეტულად კი ერთიანი ტოპოგრაფიული გეგმის შექმნას გულისხმობს, რომელიც ტერიტორიის ზონებად დაყოფას, ხოლო თითოეული ზონის სტრატეგიულ დაგეგმარებას ითვალისწინებს.