სტაჟიორობიდან პრემიერობამდე - ირაკლი ღარიბაშვილის პოლიტიკური გზა

პოლიტიკა - 20:53, 23 Dec, 2015

2506

საქართველოს რიგით მე-11 პრემიერ-მინისტრმა თანამდებობა დატოვა. ირაკლი ღარიბაშვილის გადადგომის მიზეზებზე არც თავად ღარიბაშვილს და არც „ოცნების“ ხელისუფლებას არ უსაუბრია. აწ უკვე ყოფილი პრემიერის თქმით მან ბიძინა ივანიშვილის ქმედება გამოიყენა მაგალითად, რაც დროულად მოსვლას და დროულად წასვლას გულისხმობს.

33 წლის ირაკლი ღარიბაშვილის პოლიტიკური წარსული მრავალფეროვანი არაა, მას პოლიტიკასთან პირველი შეხება 2001–2002 წლებში უნივერსიტეტში სწავლის პარალელურად საქართველოს პარლამენტის საგარეო ურთიერთობათა კომიტეტში სტაჟირების დროს ქონდა. შემდეგ მისი კარიერა „ქართუ ჯგუფს“ და ბიძინა ივანიშვილს მჭიდროდ დაუკავშირდა. 2004–2005 წლებში მუშაობდა „ქართუ ჯგუფის“ კომპანია ბურჯში. 2005-2008 წლებში იყო სააქციო საზოგადოება „ქართუ ჯგუფის“ პრეზიდენტის თანაშემწე. 2006 წლიდან 2012 წლის 14 თებერვლამდე იყო საერთაშორისო საქველმოქმედო ფონდ „ქართუს“ გამგეობის თავმჯდომარე. 2006 წელს ირაკლი ღარიბაშვილი იყო საქართველოში სან-მარინოს რესპუბლიკის საპატიო კონსულის პირადი წარმომადგენელი. 2007-2012 წლებში იყო სააქციო საზოგადოება „ბანკი ქართუს“ სამეთვალყურეო საბჭოს წევრი.

პოლიტიკური კარიერა ირაკლი ღარიბაშვილმა 2012 წლიდან დაიწყო. სწორედ ამ დროს გახდა ის ქართული ოცნება-დემოკრატიული საქართველო-ს დამფუძნებელი და პარტიის სარევიზიო კომისიის ხელმძღვანელი.

2012 წლის 25 ოქტომბერს ღარიბაშვილი მაშინდელმა პრემიერმინისტრმა ბიძინა ივანიშვილმა შს მინისტრის თანამდებობაზე წარადგინა. 2013 წლის 20 ნოემბერს კი შს მინისტრის პოსტზე ერთწლიანი მუშაობის შემდეგ, იგი ქვეყნის პრემიერმინისტრი გახდა. პრემიერმინისტრობის 25 თვის და 3 დღის შემდეგ ღარიბაშვილმა თანამდებობა დატოვა.