მურუსიძეს პირადად ღარიბაშვილი მფარველობს

მურუსიძეს პირადად ღარიბაშვილი მფარველობს - ზაზა ხატიაშვილი

პოლიტიკა - 13:41, 23 Dec, 2015

1855

მას შემდეგ, რაც იუსტიციის უმაღლესი საბჭოს მდივანმა ლევან მურუსიძემ უარყო გავრცელებულ ინფორმაცია, რომ ის საკუთარ კანდიდატურას ხსნის და მოსამართლეების არჩევის პროცესს ეთიშება, "ნიუპოსტთან" განცხადება გააკეთა ადვოკატთა ასოციაციის თავმჯდომარე ზაზა ხატიაშვილმა. ადვოკატთა ასოციაციის თავმჯდომარე სააპელაციო სასამართლოში ლევან მურუსიძის შესაძლო არჩევას აპროტესტებს და მურუსიძის საქმიანობიდან იმ პერიოდს იხსენებს, როდესაც ის სანდრო გირგვლიანის მკვლელობაში ბრალდებულთა საქმეს იხილავდა.
ამასთან, ზაზა ხატიაშვილი აცხადებს, რომ მურუსიძეს პრემიერ ღარიბაშვილის გარემოცვა მფარველობს.
"ძალიან ცუდი რაღაც მოხდა, როცა მურუსიძემ პრესკონფერენცია ჩაატარა და მას იუსტიციის საბჭოს წევრებმა გვერდი დაუმშვენეს. ვერ დამისახელებთ ვერც ერთ ნორმალურ ქვეყანას, სადაც ადამიანები, რომლებიც ხმას აძლევენ მოსამართლეთა არჩევის პროცესს და ამავდროულად ერთ-ერთი კანდიდატის გამოსვლისას მის გვერდით დგანან და წინასწარ აფიქსირებენ საკუთარ აზრს. ჩემი ინფორმაციით, მურუსიძეს ღარიბაშვილის გარემოცვა და პირადად პრემიერი მფარველობს "- აღნიშნა ხატიაშვილმა.
როგორც ხატიაშვილმა "ნიუპოსტთან" საუბრისას აღნიშნა, როდესაც ნინო გვენეტაძე უზენაესი სასამართლოს თავმჯდომარე გახდა, იუსტიციის საბჭოში ეკატერინე გასიტაშვილის კანდიდატურა იქნა წარდგენილი, მურუსიძეს კი თავისი კანდიდატი თევზაძე ჰყავდა.
"მურუსიძის კანდიდატმა მოიგო აბსოლუტური უმრავლესობით, მას შემდეგ, რაც ღარიბაშვილი წინა დღეს მურუსიძეს შეხვდა და მთელს სასამართლო კორპუსს აჩვენა, რომ ის მურუსიძის გვერდით იყო"- დასძინა ადვოკატთა ასოციაციის თავმჯდომარემ.