ქარელის ყოფილმა გამგებელმა მოქმედს ყური მოაჭამა

პოლიტიკა - 22:53, 22 Dec, 2015

1695

ქარელის ყოფილმა გამგებელმა მოქმედს ყური მოაჭამა - ამ ინფორმაციას ტელეკომპანია "რუსთავი 2" ავრცელებს.

ქარელის მუნიციპალიტეტის ყოფილი გამგებელი, ემიკო ფეიქრიშვილი, ადასტურებს, რომ ამჟამინდელი გამგებლის, ზაზა გულიაშვილის თანაშემწე, ილია ქელეხსაშვილთან, ფიზიკური დაპირისპირება მოუვიდა.

ის ამბობს, რომ პირველმა ქელეხსაშვილმა დაარტყა და მან ყურზე მხოლოდ თავდაცვის მიზნით უკბინა.

ყურის მოჭმის ფაქტს ადასტურებს გამგებლის თანაშემწე, ილია ქელეხსაშვილი.

მან ტელეკამერასთან გამოჩენა არ ისურვა. თუმცა, სატელეფონო საუბრის დროს მომხდარი ინციდენტის დეტალები გაიხსენა.

ყოფილი გამგებელი, რომელსაც ქარელის ახალი ხელმძღვანელობა ნარკოტიკების მოხმარებაში ადანაშაულებს, ამ ეტაპზე რაიონის მაჟორიტარი დეპუტატის, ლერი ხაბელოვის, თანაშემწედ მუშაობს. გამგებლის პირველი მოადგილე არ გამორიცხავს, რომ ამ ინციდენტის გამო ურთიერთობა რაიონის ხელმძღვანელობასა და მაჟორიტარ დეპუტატს შორისაც დაიძაბოს.

გართულება გუნდის შიგნით შეიძლება მოჰყვეს იმ განცხადებებსაც, რომელსაც ემიკო ფეიქრიშვილი უკვე საჯაროდ აკეთებს.

მან დღეს ტელეკამერასთან ის მაღალჩინოსნები დაასახელა, რომლებიც მოქმედ გამგებელს მფარველობენ. მათ შორის ფეიქრიშვილი ამჟამად სახელმწიფო დაცვის სამსახურის უფროსს ანზორ ჩუბინიძეს ასახელებს, რომელიც მაშინ ბიძინა ივანიშვილის პირადი დაცვის სამსახურს ხელმძღვანელობდა.

ყოფილი გამგებელი ამბობს, რომ ქარელის მუნიციპალიტეტში არსებულ კანონდარღვევებზე ინფორმაცია მაშინდელ პრემიერ-მინისტრს, ბიძინა ივანიშვილსაც, მიაწოდა.

მომხდარ ინციდენტთან დაკავშირებით გამოძიება ქარელის პოლიციამ უკვე დაიწყო. ყოფილი გამგებელი არ გამორიცხავს, რომ ის დააპატიმრონ.

წყარო: რუსთავი 2