შეიარაღებული ძალების გენერალური შტაბის უფროსის ვახტანგ კაპანაძის ინფორმაციით, ოკუპირებული ცხინვალის რეგიონში განთავსებული სარაკეტო კომპლექსი საქართველოსთვის განკუთვნილი არ არის.

ამის შესახებ კაპანაძემ „ამერიკის ხმის“ ქართულენოვანი გამოცემის მიერ გავრცელებული ინფორმაციის საპასუხოდ განაცხადა.

მისი თქმით, სარაკეტო კომპლექსებს აქვს კონკრეტული და წერტილოვანი დარტყმების ფუნქცია.

"სარაკეტო კომპლექსი უშუალოდ საქართველოსთვის ნამდვილად არ არის განკუთვნილი და მარტო სარაკეტო კომპლექსმა არ დაარღვია ბალანსი რეგიონში. ეს მრავალჯერ აქვს დარღვეული რუსულ მხარეს. სარაკეტო კომპლექსებს აქვს თავისი ძალიან კონკრეტული და წერტილოვანი დარტყმების ფუნქცია. იქ არსებულ დაჯგუფებას გააჩნია სხვა საშუალება, რომ საფრთხე შეუქმნას საქართველოს. აღნიშნული კომპლექსები, არის უფრო შორსმიმავალი გეგმების ნაწილი", - განაცხადა ვახტანგ კაპანაძემ.

"ამერიკის ხმის" ქართულენოვანი გამოცემის ინფორმაციით, რუსეთმა ოკუპირებული ცხინვალის რეგიონში ჯავაში, "ისკანდერის" ტიპის რაკეტები განათავსა.