საქართველოს პრეზიდენტმა „2015 წელი - ქალთა წელი“ შეაჯამა და ქვეყნისა და ერის წინაშე განსაკუთრებული ღვაწლისათვის, გამორჩეული სახელმწიფოებრივი და საზოგადოებრივი მოღვაწეობისათვის ირინე ენუქიძე, გარდაცვალების შემდეგ, თამარ მეფის ორდენით დააჯილდოვა.

„თქვენთვის ცნობილია, რომ 2015 წელი მე გამოვაცხადე ქალთა წლად. ამ წლის შეჯამებისას და დასრულებისას მე გადავწყვიტე, რომ რამდენიმე ქალბატონი გამოვყო, რომელსაც მნიშვნელოვანი წვლილი მიუძღვის ჩვენი ქვეყნის და საზოგადოების მიმართ.

ქალბატონი ირინა გახდა იმ ბრძოლის სიმბოლო, რომელსაც ჰუმანურობისთვის, ადამიანის უფლებისთვის, სიცოცხლის უფლებისთვის, ძალადობის წინააღმდეგ ბრძოლა ერქვა.

ეს იყო უაღრესად მორალური ბრძოლა, რომელიც ქალბატონმა ირინამ თვითონ განსაზღვრა თავის სიტყვებით. მას მოუკლეს შვილი და ის იბრძოდა იმისთვის, რომ სხვების შვილები გადარჩენილიყვნენ, რომ ჩვენი შვილები გადარჩენილიყვნენ. მან ამ ბრძოლას თავისი სიცოცხლე შეწირა და ბოლომდე მიიყვანა.

მე მინდა პირველ რიგში თქვენ გითხრათ მადლობა, იმ ჟურნალისტებს, პოლიტიკოსებს, მოქალაქეებს, სანდროს მეგობრებს, ოჯახს, რომლებიც ძალიან რთულ ვითარებაში დაუპირისპირდნენ სისტემას და მორალური ძალით სისტემა გადატეხვამდე მიგვიყვანეს.

მე მინდა კიდევ ერთხელ ხაზი გავუსვა ამ ბრძოლის მთავარ სულისჩამდგმელს, ქალს, რომელმაც ამ ღირებულებებით გააერთიანა საზოგადოება.

მე ვაჯილდოვებ მას გარდაცვალების შემდეგ, ერთერთი ყველაზე საპატიო ჯილდოთი, ჯილდოთი რომელიც ქალბატონებისათვის არის განსაზღვრული - თამარ მეფის ორდენით, - აღნიშნა საქართველოს პრეზიდენტმა და თამარ მეფის ორდენი ირინა ენუქიძის მეუღლეს, სანდრო გირგვლიანის მამას, გურამ გირგვლიანს გადასცა.