მურუსიძის დანიშვნა გირგვლიანების ტრაგედიაზე პასუხისმგებლობის განაწილებას ნიშნავს- ბურჭულაძე

პოლიტიკა - 12:32, 22 Dec, 2015

1526

საქართველოს განვითარების ფონდის დამფუძნებელი პაატა ბურჭულაძე სააპელაციო სასამართლოში ლევან მურუსიძის უვადოდ გამწესების წინააღმდეგია. ამის შესახებ განცხადება ბურჭულაძემ დღეს გამართულ საგანგებო პრესკონფერენციაზე გააკეთა. ბურჭულაძის თქმით ხელისუფლებამ უკანონო განაჩენებზე ხელმომწერი მოსამართლეების უვადოდ დანიშვნას მხარი არ უნდა დაუჭიროს:

"საქართველოს ხელისუფლებას და სასამართლოს ეძლევა შესაძლებლობა პარასკევს დაგეგმილ კენჭისყრაზე არჩევანი ტრადიციულ უსამართლობასა და სასამართლოს რეპუტაციას შორის გააკეთოს - გირგვლიანის საქმის მოსამართლის ლევან მურუსიძის უვადოდ დანიშვნა ნიშნავს, რომ დღევანდელი ხელისუფლება წინა ხელისუფლებასთან ერთად, გირგვლიანების ტრაგედიაზე პასუხისმგებლობას ინაწილებს. შესაბამისად, საქართველოს ხელისუფლება სრულად ანგრევს სასამართლო სისტემას, იმ აუცილებელი რეფორმიც ნაცვლად, რომელიც სისტემაში არის გასატარებელი. მოვითხოვთ, საქართველოს ხელისუფლებისგან: ნუ დაუჭერს მხარს უსამართლო და უკანონო განაჩენებზე ხელმომწერი მოსამართლეების უვადო დანიშვნას, რაც სრულად და საბოლოოდ შელახავს სასამართლოს რეპუტაციას“- განაცხადა პაატა ბურჭულაძემ.

პრესკონფერენციაზე განცხადება გააკეთა ფონდის ერთ-ერთმა დამფუძნებელმა დავით ჯანდიერმაც, მისი თქმით გირგვლიანის საქმე საზოგადოების ღირსების საქმეა და მურუსიძის ადგილი სასამართლო სისტემაში არ უნდა იყოს:
"მოვუწოდებ ხელისუფლებას, ნუ გადალახავს წითელ ხაზს, რომლის იქით მას პრეტენზია სამართლიანობაზე ვეღარ ექნება. სტრასბურგის სასამართლოს გადაწყვეტილების მიხედვით, სადავო არ არის, რომ მურუსიძის და სხვა მოსამართლეების მიერ გამოტანილი განაჩენი გვირგვლიანის საქმეზე, უხეშად არღვევს ადამიანის უფლებებს და მათ შორის ყველაზე მთავარს - ადამიანის სიცოცხლის უფლებას. მურუსიძის ადგილი არ უნდა იყოს სასამართლო სისტემაში. მეტიც დროა დაიწყოს სასამართლოს რეალური რეფორმა, იმისთვის რომ ერთხელ და სამუდამოდ აღდგეს ქვეყნის სასამართლო სისტემის რეპუტაცია და ქვეყნის მოსახლეობას გაუჩნდეს ნდობა მართლმასაჯულების მიმართ." - განაცხადა დავით ჯანდიერმა.