ბიუროს სხდომაზე პარლამენტის თავმჯდომარემ დავით უსუფაშვილმა და ადამიანის უფლებათა დაცვის კომიტეტის თავმჯდომარემ ეკა ბესელიამ იკამათეს.

სხდომაზე ლევან ბეჟაშვილზე თავდასხმის ფაქტს განიხილავდნენ, რაზეც დავით უსუფაშვილმა აღნიშნა, რომ მსგავი შემთხვევების დროს პარლამენტმა პრინციპული პოზიცია უნდა დააფიქსიროს.

„მინდა ყველას გთხოვოთ, რომ ამ ტიპის მოვლენებისსადმი შევძლოთ ვიყოთ პარლამენტი და არა ის ფრაქცია, ეს ფრაქცია და ვინ რას იმსახურებს ცხოვრებაში",- აღნიშნა დავით უსუფაშვილმა.

ამის შემდეგ ეკა ბესელიამ უსუფაშვილს სთხოვა, რომ პრინციპულობა გამოიჩინოს პარლამენტმა მაშინაც, როდესაც დეპუტატების და კონკრეტულად მის წინააღმდეგ ოპონენტების მხრიდან უსაფუძვლო ბრალდებების ისმის.

"არ არის აუცილებელი ვიღაცას თავში მოხვდეს. შეიძლება სიტყვას გაცილებით მძიმე შედეგი მოჰყვეს. ამიტომ მე მგონია, რომ ჩვენ ასეთივე თანმიმდევრული და კრიტიკული პოზიცია უნდა გვქონდეს, როდესაც ნებისმიერი ჯგუფის და ოპონენტის მხრიდან პარლამენტის მიერ მიღებული გადაწყვეტილების მიმართ ხდება ისეთი დაუშვებელი და ამაზრზენი შეტევა, რისი მოწმეებიც ბოლო პერიოდში ვართ“, - განაცხადა ეკა ბესელიამ, რის შემდეგაც მან ბიუროს სხდომის დატოვება გადაწყვიტა.

„იქნებ ერთი წუთი დაგველოდოთ, არ დაგვისრულებია მუშაობა. არასწორად გეგონათ არა მხოლოდ ეს და მათ შორის ის, თუ ვინ პრინციპულ პოზიციას აფიქსირებს და ვინ - არა. პრინციპული დამოკიდებულებაა ყველაფერთან დაკავშირებით აუცილებელი. თუ რომელიმე თქვენგანს გაქვთ რაიმე სათქმელი, რომ რაიმე საკითხთან დაკავშირებით უპრინციპო პოზიცია დავიკავე, ეს ცოტა უკეთ განმიმარტოთ იქნებ. თქვენ გვიწუნებთ არა უპრინციპობას, არამედ მეტი პრინციპულობისკენ მოგვიწოდებთ“, - მიმართა უსუფაშვილმა ბესელიას.