მთავრობს წევრები პრემიერ-მინისტრის დღევანდელ ანგარიშს აფასებენ. ყველა მინისტრი განსაკუთრებით გამოყოფს იმ პროექტს, რომელიც მისი უწყების განხორციელდა. მინისტრთა კაბინეტის ყველა წევრი ერთხმად თანხმდება, რომ წლის ყველაზე მნიშვნელოვანი მოვლენა იყო ის დასკვნა, რომელიც რამდენიმე დღის წინ ევროკომისიამ გამოაქვეყნა.

„გამაერთიანებელი ფაქტორი, რომელიც თითოეული უწყების მიერ განხორციელებულ რეფორმებში დავინახოთ, არის ევროპულობა, რომელიც გამოიხატება ნებისმიერი სამინისტროს მუშაობაში, რომელიც გამოიხატება ასოცირების შეთანხმებისა თუ თავისუფალი სავაჭრო სივრცის, თუ ვიზალიბერალიზაციის სამოქმედო გეგმის, ამ ძირითადი ინსტრუმენტების იმპლემენტაციის თვალსაზრისით მაღალ საშემსრულებლო ხარისხში“, - აღნიშნა ევროინტეგრაციის საკითხებში სახელმწიფო მინისტრმა დავით ბაქრაძემ.

ეკონომიკის მინისტრმა აღნიშნა, რომ მნიშვნელოვანი მოვლენა იყო ევროპასთან თავისუფალი ვაჭრობის შესახებ ხელშეკრულების გაფორმებას.

„ერთ-ერთი ყველაზე დიდი მიღწევა, რომელიც ჩვენს ხელისუფლებას აქვს ეკონომიკაში, ეს არის ის თავისუფალი სავაჭრო ხელშეკრულება, რომელიც გაფორმდა ევროპასთან. ამან უნდა მოგვცეს შესაძლებლობა 500 მილიონიან ბაზარზე გავიტანოთ ჩვენი პროდუქცია“, - განაცხადა დიმიტრი ქუმსიშვილმა.

საკუთარი უწყებაში განხორციელებული პროექტები დადებითად შეაფასა ენერგეტიკის მინისტრმაც.

„ენერგეტიკის დარგში ბევრი მნიშვნელოვანი პროექტი განხორციელდა. ეს არის ახალი ჰიდროელექტროსადგურები, თბოელელექტროსადგურები... ეს ყველაფერი კეთდება ერთი მარტივი მიზეზის გამო, რომ რაც შეიძლება სწრაფად საქართველო გახდეს ენერგეტიკულად დამოუკიდებელი ქვეყანა“, - განაცხადა კახი კალაძემ.

ღარიბაშვილმა მთავრობის საქმიანობის სამწლიანი ანგარიში დღეს წარადგინა. მან მთავრობის მიღწევებზე ისაუბრა. როგორც ირაკლი ღარიბაშვილმა აღნიშნა, "ქართული ოცნების" ხელისუფლებაში მოსვლის შემდეგ შემცირდა უმუშევრობა. პრემიერმა პენსიის და მასწავლებლების ხელფასების ზრდაზეც ისაუბრა. ასევე მან სხვადასხვა სამინისტროების მუშაობაც შეაფასა.