პრემიერ-მინისტრის ინიციატივით, დევნილი და სოციალურად დაუცველი ნიჭიერი სტუდენტებისთვის, ლისის ტბის ფერდობზე შენდება თანამედროვე სტანდარტების 320-ადგილიანი სტუდენტური საერთო საცხოვრებელი.

ირაკლი ღარიბაშვილმა ხაზგასმით აღნიშნა საერთაშორისო პარტნიორების თანადგომა და განაცხადა, რომ სან-დიეგოს სახელმწიფო უნივერსიტეტი საქართველოს უნივერსიტეტებთან თანამშრომლობით ახორციელებს ამერიკული ბაკალავრიატის პროგრამებს ქიმიაში, ინჟინერიასა და ტექნოლოგიებში.

"სახელმწიფო სტიმულს აძლევს საინჟინრო და ტექნიკური სპეციალობების პოპურაობის ზრდას. მე საკუთარი გამოცდილებით კარგად ვიცი მსოფლიოს წამყვან უნივერსიტეტებში სწავლის ფასი. ამიტომ განსაკუთრებულ ყურადღებას ვუთმობ განათლების საერთაშორისო ცენტრის საქმიანობას, რომელიც შარშან შევქმენით,"- განაცხადა ირაკლი ღარიბაშვილმა.

მთავრობის მეთაურმა ასევე ისაუბრა განათლების საერთაშორისო ცენტრის საქმიანობაზე, რომელიც ნიჭიერ და მოტივირებულ სტუდენტებს უცხოეთის პრესტიჟულ სასწავლებლებში განათლების მიღებაში ეხმარება. მსოფლიოს სამაგისტრო და სადოქტორო პროგრამებზე სწავლისთვის გრანტი უკვე 192 ახალგაზრდას დაუმტკიცდა.