ეროვნულ-დემოკრატიული ინსტიტუტი (NDI) მიმდინარე წლის ნოემბრის საზოგადოებრივი აზრის კვლევის შედეგებს აქვეყნებს. კითხვაზე „შემდეგ საპარლამენტო არჩევნებზე რამდენად მნიშვნელოვანი ან უმნიშვნელო გავლენა შეიძლება მოახდინონ შემდეგმა ფაქტორებმა თქვენს გადაწყვეტილებაზე“ 65% მიიჩნევს, რომ მნიშვნელოვანია ნდობა პოლიტიკური პარტიების ცალკეული წარმომადგენლების მიმართ.

კვლევაში მონაწილეთა 58%-ზე გავლენას მოახდენს პარტიის საარჩევნო პროგრამა და დაპირებები. 43%-ზე ახლობლების პოლიტიკური შეხედულებები, ხოლო 41%-ზე მრევლის და მღვდლის პოლიტიკური შეხედულებები. ასევე 41% აცხადებს, რომ საპარლამენტო არჩევნებზე მათ გადაწყვეტილებაზე გავლენას მოახდენს პარტიის მიერ არჩევნებზე გამარჯვების მაღალი შანსი. გამოკითხულთა 25-25% ამბობს, რომ მათ გადაწყვეტილებაზე გავლენას მოახდენს დამსაქმებლის და თანამშრომლების, ასევე პოპულარული ადამიანების პოლიტიკური შეხედულებები.

მღვდლისა და მრევლის პოლიტიკური შეხედულებებს არც მნიშვნელოვანია და არც უმნიშვნელო გამოკითხულ მოქალაქეთა 19 პროცენტისთვის.

გამოკითხულ მოქალაქეთა 33 პროცენტი კი ამბობს, რომ მღვდლისა და მრევლის პოლიტიკური შეხედულებები მისთვის მნიშვნელოვანი არ არის და შესაბამისად გავლენასაც ვერ მოახდენს.

ეროვნულ-დემოკრატიული ინსტიტუტის (NDI) ბოლო კვლევის საველე სამუშაოები 17 ნოემბერი - 7 დეკემბრის პერიოდში ჩატარდა. საქართველოს მასშტაბით გამოიკითხა 1881 ადამიანი. NDI-ის კვლევებს აფინანსებს შვედეთის საერთაშორისო განვითარების და თანამშრომლობის სააგენტო (Sida) და ატარებს CRRC-საქართველო.