ევროატლანტიკურ სტრუქტურებში ინტეგრაციის საკითხებში სახელმწიფო მინისტრი დავით ბაქრაძე აცხადებს, რომ "უვიზო მიმოსვლა ოკუპირებულ ტერიტორიაზე მაცხოვრებელ მოქალაქეებსაც შეეხებათ".

"ევროპამ თქვა, რომ საქართველოს ყველა მოქალაქისთვის ევროპის კარი არის ღია. საქართველო მთავრობის მიერ განხორციელებული რეფორმები იყო მართებული და სწორი და დასრულდა იმ შედეგით, რომლითაც ძალიან მაღალი შეფასება დაიმსახურა ამ რეფორმების პროცესმა. ეს პროცესი დასრულდება რამდენიმე თვეში, რომლის შემდეგაც საქართველოს მოქალაქეებისთვის მათ შორის ოკუპირებულ ზონაში მცხოვრები ჩვენი დები და ძმებისთვის იქნება შენგენის ზონა თავისუფალი მიმოსვლის სივრცე,“ - განაცხადა დავით ბაქრაძემ.

დავით ბაქრაძის განმარტებით საქართველოს ყველა მოქალაქეს უვიზო მიმოსვლის 90 დღიანი ვადა აქვს განსაზღვრული და ეს ვადა უნდა დაიცვას. წინააღმდეგ შემთხვევაში ის თავად შეიზღუდავს მომავალში ევროპაში მოგზაურობის შესაძლებლობას.

გუშინ 18 დეკემბერს, ევროკომისიამ სარეკომენდაციო ანგარიშით ევრობლოკის წევრ ქვეყნებს მიმართა საქართველოსთან შემსუბუქებული სავიზო რეჟიმის დაწესების შესახებ. ევროკომისიამ განაცხადა, რომ საქართველომ სავიზო რეჟიმის ლიბერალიზაციის სამოქმედო გეგმის ყველა ამოცანა შეასრულა. სამოქმედო გეგმა კი არის დეტალური ნუსხა იმ ნაბიჯებისა, რომელიც საქართველოს, დაწყებული 2013 წლის თებერვლიდან, უნდა შეესრულებინა შენგენის ზონაში უვიზო მიმოსვლის მისაღებად. ევროპარლამენტის და წევრი ქვეყნების მიერ ამ ინიციატივის დამტკიცების პროცესი, როგორც საქართველოში იმედოვნებენ, 2016 წლის შუა პერიოდისთვის დასრულდება.