საქართველოს ევროკომისიის დადებით ანგარიშს მსოფლიო ლიდერები ულოცავენ

პოლიტიკა - 21:22, 18 Dec, 2015

1440

მსოფლიო ლიდერები საქართველოს ვიზალიბერალიზაციასთან დაკავშირებით ევროკომისიის დადებით ანგარიშს ულოცავენ.

დადებით ანგარიშთან დაკავშირებით ევროკომისია "ტვიტერის" ოფიციალურ გვერდზე იუწყება და წერს, რომ "საქართველო ვიზალიბერალიზაციის კრიტერიუმებს აკმაყოფილებს".

„საქართველოსა და უკრაინას პოზიტიურ შედეგებს ვულოცავ. რეფორმებს თქვენი მოქალაქებიისთვის ნამდვილი სიკეთე მოაქვს!", - წერს ევროკომისარი იოჰანეს ჰანი ტვიტერზე.

"საქართველოსთვის, უკრაინისთვის და კოსოვოსთვის ვიზალიბერალიზაციის მინიჭება ევროკომისიის მიერ დადებითი ნაბიჯია. წაახალისეთ ევროკავშირის წევრი ქვეყნები, რომ ეს გადაწყვეტილება აღასრულონ", - წერს ევროპარლამენტის პრეზიდენტი მარტინ შულცი.

„საქართველოსა და უკრაინას ვულოცავთ ევროკავშირთან ვიზალიბერალიზაციის გზაზე მიღწეულ პროგრესს“, - წერს სოციალურ ქსელში ლიტვის პრეზიდენტი დალია გრიბაუსკაიტე.

"დიდხანს ნანატრი და დამსახურებული ახალი ამბავი - საქართველოსა და უკრაინის მიერ მიღწეული პოზიტიური პროგრესი", - აცხადებს ლიტვის საგარეო საქმეთა მინისტრი ლინას ლინკევიჩიუსი.

"მივესალმებით საქართველოსა და უკრაინასთან დაკავიშირებულ პოზიტიურ პროგრესს. ევროკავშირმა გადაწყვეტილება დროულად უნდა მიიღოს", - წერს ლატვიის საგარეო საქმეთა მინისტრი ედგარს რინკევიჩსი.