გვეამაყება, რომ ასეთ მნიშვნელოვან პროცესში ჩვენი წვლილი გვაქვს შეტანილი

გვეამაყება, რომ ასეთ მნიშვნელოვან პროცესში ჩვენი წვლილი გვაქვს შეტანილი - "თავისუფალი დემოკრატები"

პოლიტიკა - 21:03, 18 Dec, 2015

1430

პარტია „თავისუფალი დემოკრატები“ ევროპასთან უვიზო მიმოსვლის სამოქმედო გეგმის შესრულებასთან დაკავშირებით ევროკომისიის დადებით ანგარიშს მიესალმება.

როგორც პარტიის მიერ გავრცელებულ განცხადებაშია ნათქვამი, საბოლოო ანგარიშის გამოქვეყნებით სამწლიანი დაძაბული მუშაობა დასრულდა.

„თავისუფალ დემოკრატებს“ გვეამაყება, რომ ასეთ მნიშვნელოვან, ისტორიულ პროცესში ჩვენი წვლილი გვაქვს შეტანილი. ევროპასთან უვიზო მიმოსვლა ის უდიდესი წინსვლაა, რომლითაც საქართველო, საბოლოოდ ევროპის პოლიტიკური, სოციალური, კულტურული თუ გეოგრაფიული ნაწილი სრულფასოვნად გახდება“, - ნათქვამია პარტიის განცხადებაში.

„თავისუფალი დემოკრატები“ საქართველოს მთავრობას მოუწოდებენ, პროცესის დროულად დასრულებისა და აღებული ვალდებულებების სრულად შესასრულებლად ყველა ნაბიჯი გადადგას.

„თავისუფალი დემოკრატები“ გავაკეთებთ ყველაფერს, რათა ქვეყანამ მიაღწიოს დასახულ მიზანს - გავხდეთ ევროკავშირის წევრი! გვსურს მივულოცოთ მთლიანად საქართველოს მოსახლეობას და განსაკუთრებით ყველა იმ უწყების ასობით მოხელეს, რომელმაც განვლილი წლების მანძილზე უდიდესი შრომა და ძალისხმევა ჩადო ამ წარმატების მიღწევაში“, - აცხადებენ „თავისუფალ დემოკრატებში“.