,,ეს ძალიან დიდი ავანსია, რაც საქართველომ ევროპისგან მიიღო“

,,ეს ძალიან დიდი ავანსია, რაც საქართველომ ევროპისგან მიიღო“ - ბაჩუკი ქარდავა ვიზალიბერალიზაციაზე

პოლიტიკა - 20:21, 18 Dec, 2015

1828

ევროკომისიის დადებითი ანგარიშის გამოქვეყნებასთან დაკავშირებით "ნიუპოსტთან" განცხადებას აკეთებს "ეროვნულ-დემოკრატიული პარტიის" თავმჯდომარე ბაჩუკი ქარდავა.

არასაპარლამენტო ოპოზიციის ერთ-ერთი ლიდერი აცხადებს, რომ საქართველო ევროპის ნაწილია და შეუძლებელია ეს ისტორიული სამართლიანობა არ აღდგეს.

"როდესაც წავიკითხე ინფორმაცია, რომ ევროკომისიამ ვიზალიბერალიზაციასთან დაკავშირებით საქართველოს შესახებ ანგარიში გამოაქვეყნა, სიმართლე გითხრათ, არ გამკვირვებია, შეფერხებები მაშინებდა, მაგრამ დარწმუნებული ვიყავი, რომ ამგვარი ნაბიჯი დასავლეთის მხრიდან, განსაკუთრებით ევროპის მხრიდან გადადგმული იქნებოდა.

ჩვენს ქვეყანაში ძალიან ბევრი სკეპტიკოსი არსებობს, ძალიან ბევრი ადამიანი აბსოლუტურად დარწმუნებული იყო იმაში, რომ დასავლეთმა გზა ჩაგვიკეტა; არსებობდნენ ადამიანები, მცირე რაოდენობით, თუმცა ისეთები, რომლებიც ჩრდილოეთისკენ იხედებოდნენ და დარწმუნებულნი იყვნენ, რომ დასავლეთის ნაწილი საქართველო ვერასოდეს გახდებოდა... ამის მიუხედავად, მე ყოველთვის სიღრმეებიდან ვუყურებდი ამ პროცესს და ეჭვი არასდროს შემპარვია, რომ საქართველო ევროპის ნაწილია და შეუძლებელია ეს ისტორიული სამართლიანობა არ აღდგეს. ამის დასტური იყო ბრიუსელში მიღებული პოლიტიკური გადაწყვეტილება - დადასტურდა, რომ ევროპის კარი საქართველოსთვის ღიაა, რა ხარვეზებიც არ უნდა გვქონდეს ჩვენს ქვეყანაში, სახელმწიფოებრობასთან მიმართებით, დემოკრატიის განვითარების კუთხით და ასე შემდეგ... ძალიან ბევრი პრობლემები შეიძლება არსებობდეს, თუმცა მათი ჩამოთვლა ასეთ მნიშვნელოვან დღეს, ნამდვილად არ მსურს.

ერთ რამეს ნამდვილად ვხედავ - ეს არის ძალიან სერიოზული ნაბიჯი იმისათვის, რომ ჩვენ გავხდეთ მსოლფიოს იმ ცივილიზებული სამყაროს წევრი, რომლის ნაწილიც ყოველთვის ვიყავით" - აცხადებს ბაჩუკი ქარდავა.

მისივე თქმით, მიუხედავად ამ მნიშვნელოვანი ნაბიჯისა, საქართველოს ,,სამუშაო ძალიან ბევრი აქვს".

,,თუ ვინმეს ჰქონდა მოლოდინი, რომ გზა გვეკეტებოდა, დღეს მე მაქვს ასეთი განცდა, რომ ეს ძალიან დიდი ავანსია, რაც საქართველომ მიიღო" - აღნიშნა ედპ-ს ლიდერმა.

ცნობისთვის, ევროკომისიამ ვიზალიბერალიზაციასთან დაკავშირებით საქართველოს შესახებ ანგარიში გამოაქვეყნა. დოკუმენტი საქართველოს შესახებ დადებით შეფასებებს შეიცავს.