ბრიუსელში მიღებული გადაწყვეტილება საქართველოსთვის სერიოზული შანსია

ბრიუსელში მიღებული გადაწყვეტილება საქართველოსთვის სერიოზული შანსია - მანანა ნაჭყებია

პოლიტიკა - 19:04, 18 Dec, 2015

1456

ევროკომისიის რიგით მეოთხე დასკვნას საქართველოს ვიზალიბერალიზაციის შესახებ „ახალი მემარჯვენეების“ პოლიტიკური მდივანი მანანა ნაჭყებია "ნიუპოსტთან" აფასებს. მისი თქმით, ბრიუსელში მიღებული გადაწყვეტილება სერიოზული შანსია საქართველოს მოსახლეობისთვის. "პირველ რიგში, მინდა მივულოცო საქართველოს ეს მართლაც წინგადადგმული ნაბიჯი ევროინტეგრაციის გზაზე. ჩვენ დღეს მოვახერხეთ და გადავდგით ნაბიჯი ევროპისკენ. რაც შეეხება იმას, თუ რას მოუტანს ეს ჩვენს ქვეყანას, ეს არის შეასაძლებლობა ახალგაზრდა თაობისთვის ეზიაროს ევროპას, ევროპულ განათლებას და ზოგადად მოხდეს მისი ინტეგრირება ევროპულ სივრცეში"- აცხადებს მანანა ნაჭყებია.

"ახალი მემარჯვენეების" ერთ-ერთი ლიდერი დღეიდან ევროპისგან მეტ სარგებელს ელოდება.

"რაც მთავარია, ევროპისგან უნდა მივიღოთ ბევრად მეტი დახმარება დემოკრატიის ექსპორტის თვალსაზრისით. იმ სკეპტიკოსების აზრი, რომლებიც ცდილობდნენ ხალხისთვის მოეხვიათ აზრი, რომ ევროპა ჩვენსკენ არ გამოიხედავს, გაქარწყლდა. ეს არის უპრეცედენტო შემთხვევა, ჩვენმა ქვეყანამ შეასრულა ყველა ვალდებულება და ამ ვალდებულების შესრულებიდან გამომდინარე ის ხდება ევროპული ოჯახის წევრი. ბუნებრივია, გაჩნდა შანსი იმისა, რომ ეს ნაბიჯი გახდეს საწინდარი სხვა წარმატებისა. ამ ყველაფერმა აჩვენა, რომ შანსი არის ნატოსა და ევროკავშირის წევრობისა"- დასძინა მანანა ნაჭყებიამ.

"ნიუპოსტთან" საუბრისას არასაპარლამენტო ოპოზიციის წარმომადგენელმა, რუსეთის პრეზიდენტის განცხადებაც შეაფასა, რომელიც საქართველოს მოქალაქეებისთვის რუსეთთან სავიზო რეჟიმის შესაძლო გაუქმებას ეხება.

მანანა ნაჭყებია, რუსეთის გააქტიურებას ვიზალიბერალიზაციის მიღებას უკავშირებს.

"რუსეთმა დაინახა, რომ მის გარეშეც შეიძლება საქართველომ მიაღწიოს წარმატებას ევროპის მიმართულებით და გვთავაზობს უვიზო რეჟიმს. პუტინი მიხვდა, რომ საქართველოსთვის ბევრად უფრო მნიშვნელოვანია ევროპული და არა ევრაზიული პერსპექტივა" - აღნიშნა მანანა ნაჭყებიამ.