ბიზნესმენი ლევან ვასაძე მედიის და არასამთავრობო ორგანიზაციების გაკონტროლებას ითხოვს. აღნიშნული მოთხოვნით ვასაძე ხელისუფლებას მიმართავს და შესაბამისი საკონსტიტუციო და საკანონმდებლო ცვლილებებს და საზოგადოებრივი კომისიის შექმნას სთავაზობს.

ვასაძე ასევე მიიჩნევს, რომ პასუხისგებაში უნდა მიეცნენ „ნაციონალური მოძრაობის“ წევრები, ვინც „თავისუფალ ცხოვრებას აგრძელებენ საქართველოში და ეწევიან ანტისახელმწიფოებრივ საქმიანობას“.

„ჩვენს ქვეყანაში ვხედავთ აგრესიის მკვეთრ და ლოკალურ გამოვლინებებს. ჩვენს ქვეყანაშიც, რომელიც ბუნებრივია კაცობრიობის საერთო სახლის ნაწილია, ვხედავთ აგრესიის მკვეთრ ლოკალურ გამოვლინებებს, როგორც ყოველთვის აგრესიის მთავარი სამიზნე არის ჩვენი ეკლესია, ოჯახი და ჩვენი ეროვნული ღირებულებები. ქვეყნის ცენტრალური ტელეარხებიდან, რომელთა აბსოლუტური უმრავლესობაც ქცეულა გაუნათლებლობის, უგემოვნებით, აგრესიისა და უზნეობის მთავარ წყაროებად, გაისმის მოწოდებები ეკლესიაზე შეტევისაკენ. ჩვეულებრივ ამბად იქცა საჯაროდ ცნობილი გარყვნილი არაადამიანების მხრიდან ქართული ოჯახური და ეროვნული ტრადიციების დაცინვა და შეურაცხყოფა. უკვე დაიწყო ჭინკების ცემა-ტყეპა ხალხის მხრიდან საზოგადოებრივი თავშეყრის ადგილებში. ეს არის თქვენი პასიურობის შედეგი. როდესაც ხალხი ხედავს მის ღირსებას არ იცავს მისი რჩეული კანონიერი ხელისუფლება, იგი საკუთარ ხელში იღებს ამ ღირსების დაცვის სადავეებს", - განაცხადა ლევან ვასაძემ.