მთავრობის წევრები აცხადებენ, რომ ვიზა ლიბერალიზაციის შესახებ ევროკომისიის დასკვნა პოზიტიური იქნება

პოლიტიკა - 12:16, 18 Dec, 2015

1564

საქართველოს მთავრობის წევრები ადასტურებენ, რომ ვიზა ლიბერალიზაციის შესახებ ევროკომისიის დასკვნა პოზიტიური იქნება.
საქართველოს პრემიერ-მინისტრის განცხადებით, ევროკავშირი დღეს საბოლოო ანგარიშს გამოაქვეყნებს, რომელშიც საქართველოსთან დაკავშირებით დასკვნა პოზიტიურია.
ღარიბაშვილის თქმით, ამის შესახებ დასტური საქართველოს პრემიერ-მინისტრმა ირაკლი ღარიბაშვილმა ევროკავშირის წარმომადგენლებთან გუშინდელი საუბრისას მიიღო.

საქართველოს მთავრობის მეთაური აცხადებს, რომ მიღწეული წარმატება გუშინ საღამოსვე მიულოცეს.

ვიზა ლიბერალიზაციის შესახებ ევროკომისიის დასკვნის შესახებ განცხადებები გაკეთდა მინისტრების მხრიდან.
„ჩვენ მოლოდინი გვაქვს, რომ ჩვენთვის იქნება აბსოლუტურად უპირობოდ დასკვნა წარმოდგენილი და ჩვენ ყველა ქმედება ჩაგვეთვლება სრულად შესრულებულად," - განმარტა ეკონომიკის მინისტრმა დიმიტრი ქუმსიშვილმა.
პოზიტიურ შედეგებს ელოდება განათლების მინისტრი. თამარ სანიკიძის შეფასებით, სამი წლის განმავლობაში ყველაფერი გაკეთდა მთავრობის მხრიდან, რომ დღეს ეს შედეგი დამდგარიყო.
შერიგებისა და სამოქალაქო თანასწორობის საკითხებში სახელმწიფო მინისტრ პაატა ზაქარეიშვილის შეფასებით კი ევროკავშირთან ვიზალიბერალიზაციის თვალსაზრისით ისტორიული დღეა და დღეს რუსეთზე საუბარი არასერიოზულია.

"ცხოვრებაში ძალიან იშვიათად ვიყენებ სიტყვა "ისტორიულს" და მართლაც, დღეს არის ისტორიული დღე და ნამდვილად არ ვაპირებ სხვა თემებზე საუბარს. ვულოცავ მთელ ქართველ ერს, მთელ ნაციას ასეთ მნიშვნელოვან ისტორიულ გადაწყვეტილებას, რომ საქართველომ გადადგა სერიოზული ინსტიტუციური ნაბიჯი ევროპისაკენ. რუსეთი ამ წუთში არის არასერიოზული სალაპარაკო, როდესაც გვაქვს ევროპაზე სასაუბრო. ევროპამ მიიღო გადაწყვეტილება, რომელიც ჩემთვის მილიონჯერ უფრო მნიშვნელოვანია, ვიდრე სხვა რამ ღონისძიება", - განაცხადა პაატა ზაქარეიშვილმა.
ევროკომისიის ანგარიშთან დაკავშირებით განცხადება მთავრობის დასრულების შემდეგ არ გაუკეთებია საგარეო საქმეთა მინისტრს. არსებული ინფორმაციით, გიორგი კვირიკაშვილი ამ საკითხზე სპეციალურ განცხადებას დოკუმენტის გამოქვეყნების შემდეგ გააკეთებს.

ევროკომისია საქართველოს მიერ სავიზო რეჟიმის ლიბერალიზაციის სამოქმედო გეგმის შესრულების შესახებ ანგარიშს დღეს გამოაქვეყნებს.

ანგარიშის გამოქვეყნების პარალელურად ელჩი იანოშ ჰერმანის პრესკონფერენცია გაიმართება.

დასკვნის გამოქვეყნება 15 დეკემბერს უნდა მომხდარიყო, თუმცა ევროკომისიის გადაწყვეტილებით რამდენიმე დღით გადაიდო.