გიორგი მარგველაშვილი ხელს აწერს მოწმეთა დაკითხვის წესის 20 თებერვლამდე გადავადებას

პოლიტიკა - 21:13, 17 Dec, 2015

1403

საქართველოს პრეზიდენტის საპარლამენტო მდივანმა გიორგი კვერენჩხილაძემ დღეს საღამოს გამართულ პრესკონფერენციაზე ჟურნალისტებს განუცხადა, რომ გიორგი მარგველაშვილი ხელს აწერს მოწმეთა დაკითხვის წესის გადავადებას 20 თებერვლამდე, რაც ტექნიკური მიზეზებითაა განპირობებული.
"საქართველოს პრეზიდენტი ყურადღებით აკვირდებოდა და მომავალშიც დააკვირდება პარლამენტში მოწმეთა დაკითხვის წესთან დაკავშირებით მიმდინარე მსჯელობას და მისი პოლიტიკური გადაწყვეტილება ამ ძალიან მნიშვნელოვან საკითხთან დაკავშირებით სწორედ მას შემდეგ გახდება ცნობილი, რაც პარლამენტი მოწმეთა დაკითხვის ახალ წესზე რეგულაციებს მიიღებს" - აღნიშნა პრეზიდენტის საპარლამენტო მდივანმა.
კვერენჩხილაძის განცხადებით, "დღეს საქართველოში გამოძიების პროცესი მოწმის დაკითხვასთან დაკავშირებით ჯერ კიდევ 1998 წელს მიღებული სისხლის სამართლის საპროცესო კოდექსით დადგენილი წესი მოქმედებს.
"მიმდინარე წლის 31 დეკემბერს უნდა ამოქმედდეს 2009 წელს მიღებული სისხლის სამართლის ახალი კოდექსით გათვალისწინებული მოწმის დაკითხვის ახალი წესი, თუმცა გუშინ საქართველოს პარლამენტმა მიიღო ცვლილებები სისხლის სამართლის საპროცესო კოდექსში და გუშინვე წარუდგინა ეს ცვლილებები საქართველოს პრეზიდენტს, რომლის მიხედვითაც საქართველოს პარლამენტმა ნაცვლად 31 დეკემბრისა მოწმის დაკითხვის ახალი წესის ამოქმედების თარიღად 2016 წლის 20 თებერვალი განსაზღვრა. ამგვარი გადავადების მიზეზად როგორც განმარტებით ბარათში, ასევე კომიტეტებსა და პლენარულ სხდომებზე აღნიშნული იყო, რომ სახელდებოდა სასამართლო რესურსების გაზრდის აუცილებლობა და ასევე გარკვეული საბიუჯეტო რესურსების მოძიების აუცილებლობა. ამასთან დაკავშირებით მინდა შევეხო რამდენიმე გარემოაბას. პირველ რიგში გაურკვევლობას ბადებს საკითხი იმის თაობაზე, რომ მაშინ, როცა ამ ნორმის, ანუ მოწმეთა დაკითხვის ახალი წესით ბოლო გადავადებიდან თითქმის 2 წელია გასული, რატომ არ მოხდა უფრო ადრე დროის რაციონალურად გამოყენების რეჟიმში იმ საჭირო მატერიალური თუ სამართლებრივი რესურსების მოძიება და გათვლა წინასწარ. ასევე გაურკვეველია და კითხვებს ბადებს ის საკითხიც, რომ მოწმეთა დაკითხვის ახალი წესი 2009 წელს იქნა მიღებული და უკვე მეხუთეჯერ მოხდა ამ ნორმის გადავადება, ეს იმ გარემოების გათვალისწინებით, რომ საკითხი ეხება საკმაოდ მნიშვნელოვან მოვლენას და ზოგადად მოწმის იმ უფლებას, რომელიც საკმაოდ მნიშვნელოვანია, ზოგადად სისხლის სამართლის კოდექსში და ზოგადად ადამიანის უფლებათა დაცვის თვალსაზრისით. მიუხედავად ამისა, გამომდინარე იქიდან, რომ პარლამენტში პარალელურ რეჟიმში იხილება სისხლის სამართლის საპროცესო კოდექსში ცვლილებები, რომელიც ეხება მოწმის დაკითხვის ახალ წელს, ეს საკითხები უკვე მეორე მოსმენით საქართველოს საკანონმდებლო ორგანოს მიერ არის მიღებული. ამ გარემოების გათვალისწინებით პრეზიდენტი ხელს აწერს 20 თებერვლამდე ტექნიკური მიზეზებით მოწმეთა დაკითხვის წესის გადავადებას" - აღნიშნა კვერენჩხილაძემ.